काठमाडौं । शिक्षा, विज्ञान तथा प्रविधिमन्त्री सुमना श्रेष्ठले नयाँ कार्यक्रमका निम्ति मन्त्रालयमा निकै कम बजेट रहेको बताएकी छन् ।

आइतबार प्रतिनिधिसभा बैठकमा उनले शिक्षा मन्त्रालयका निम्ति छुट्ट्याइएको बजेटमध्ये करिब ९३ प्रतिशत अनिवार्य दायित्वमा खर्च हुने उल्लेख गरिन् । त्यसबाट जोगिएको केही रकम मात्र नयाँ कार्यक्रमका लागि छुट्टाइएको उनले बताइन् । सार्वजनिक विद्यालयको रूपान्तरणलगायत धेरै प्रभावकारी कार्यक्रमको सुरुआत आउँदो आर्थिक वर्षदेखि हुने उनको भनाइ छ ।

उनले शिक्षा क्षेत्रमा देखिएका नीतिगत समस्या समाधान गर्न नयाँ शिक्षा ऐनसम्बन्धी विधेयक सदनमा विचाराधीन रहेको बताइन् । शिक्षकहरू प्रशासनको उच्चतम विन्दु रहेकाले दलीय आबद्धताबाट टाढा लैजानुपर्नेमा उनले जोड दिइन् ।

सामुदायिक र निजी क्षेत्रका विद्यालयको पढाइमा गुणस्तर फरक छ भन्ने भाष्य जबरजस्ती बनाइएको उनले बताइन् । सामुदायिक विद्यालयको मनोबल उच्च बनाउनुपर्ने उनले उल्लेख गरिन् । हिमालयन टेली भ्वाइस