काठमाडौं । माछापुच्छ्रे बैंक लिमिटेड र एनसेलबीच डिजिटल प्लेटफर्ममार्फत सेवा प्रदान गर्न सम्झौता भएको छ । उक्त सम्झौतापत्रमा एनसेलका प्रमुख कार्यकारी अधिकृत जाब्बोर कायुमोभ र माछापुच्छ्रे बैंकका प्रमुख कार्यकारी अधिकृत सन्तोष कोइरालाले गत सात लैनचौरस्थित एनसेल आइकनमा हस्ताक्षर गरेका हुन् ।

मोबाइलमा डेटा सकिएपछि ब्यालेन्स नकाटिने र अरू सुविधा रहेको एनसेलको ‘सधैँ अन’ योजनाअन्तर्गत यो सम्झौता गरिएको हो । सम्झौताअनुसार, माछापुच्छ्रे बैंकमा आफ्नो खाता भएका एनसेलका ग्राहकले बैंकको मोबाइल बैंकिङ एप एमबीएल एम–स्मार्टको चेक आउट सर्भिस प्रयोग गरी एनसेलको मोबाइल एप, रिटेलर्स एप र वेबसाइटमार्फत सजिलै ब्यालेन्स रिचार्ज गर्न सक्नेछन् । साथै, सेवा तथा सुविधा खरिदका निम्ति भुक्तानी समेत गर्न सक्नेछन् ।

एनसेलका वितरक तथा खुद्रा बिक्रेताले पनि रिटेलर्स एपमार्फत सिधै माछापुच्छ्रे बैंकको खातामा रहेको रकमबाट आफ्नो भर्चुअल फन्ड लोड गर्न सक्नेछन् ।

यो सम्झौताले ग्राहकको डिजिटल यात्रालाई सहज बनाउँदै सधैँ अन रहन सहयोग गर्ने एनसेल र माछापुच्छ्रे बैंकको विश्वास छ । एनसेल एपमा अरू सुविधा पनि रहेकाले ग्राहकलाई देशभित्र मात्र नभई बाहिर रोमिङमा रहँदा समेत सुविधा प्रदान गर्ने जनाइएको छ ।

माछापुच्छ्रे बैंक नगदरहित बैंकिङलाई बढावा दिँदै पहिलो डिजिटल स्मार्ट बैंकका रूपमा आफूलाई स्थापित गर्ने लक्ष्यका साथ निरन्तर अगाडि बढिरहेको जानकारी गराइएको छ । फरक–फरक माध्यममार्फत डिजिटल भुक्तानी सुविधालाई सहज बनाउन आफ्ना ग्राहकका निम्ति नवीन उत्पादन र सेवा ल्याउन माछापुच्छ्रे बैंक सधैँ तत्पर रहँदै आएको जनाइएको छ ।