काठमाडौं । कोसी प्रदेश सरकार विवादको रिट आइतबार ‘हेर्दाहेर्दै’मा राखिएको छ । सर्वोच्च अदालतको पूर्ण इजलासमा रिटमाथिको बहस नसकिएपछि हेर्दाहेर्दैमा राखिएको हो ।

गएको जेठ ३१ गते सर्वोच्चका न्यायाधीशत्रय कुमार रेग्मी, नहकुल सुवेदी र अब्दुल अजीज मुसलमानको पूर्ण इजलासमा यो रिटमाथिको बहस नसकिएपछि हेर्दाहेर्दैमा राखिएको थियो । सोही इजलासमा आइतबार पनि बहस नसकिएकाले रिट पुनः हेर्दाहेर्दैमा राखिएको हो । यही इजलासले फैसला दिने गरी सुनुवाइ प्रक्रिया अघि बढाइएको छ ।

कोसीका तत्कालीन मुख्यमन्त्री केदार कार्कीले रिट दायर गरेका हुन् । नेपालको संविधानको धारा १६८ (५) अनुसार उनी मुख्यमन्त्री बनेका थिए । आफूविरुद्ध प्रदेशसभामा अविश्वासको प्रस्ताव समेत नराखी नयाँ मुख्यमन्त्री नियुक्त गरिएपछि उनी सर्वोच्च पुगेका हुन् ।

आफूविरुद्ध अविश्वास प्रस्ताव नल्याएको, राजीनामा नदिएको र पदमुक्त हुने अरू आधार केही नभएको अवस्थामा नयाँ मुख्यमन्त्री नियुक्त गरिएको भन्दै उनले अन्तरिम आदेश माग गरेका थिए । तर, सर्वोच्चका न्यायाधीश हरि फुयालको इजलासले अन्तरिम आदेश नदिएपछि अन्तिम फैसलामै आदेश हुने गरी सुनुवाइ अघि बढाइएको हो ।