काठमाडौं । नेपालमा मनसुन भित्रिएको एक साता बितिसक्दा पनि सुस्त गतिमा बढिरहेको छ । मनसुनी प्रणाली सुस्त गतिमा रहेकाले देशभर फैलिन अझै एक साताभन्दा बढी समय लाग्ने जल तथा मौसम विज्ञान विभाग मौसम पूर्वानुमान महाशाखाले जनाएको छ ।

महाशाखाका वरिष्ठ मौसमविद् प्रतिभा मानन्धरका अनुसार मनसुन अहिले कोसी प्रदेशको पूर्वी र उत्तरी भेगमा केन्द्रित छ । मनसुन फैलिएको क्षेत्र अर्थात् कोसी प्रदेशका सबैजसो जिल्लामा वर्षा भइरहेको छ ।

मनसुन भित्रिएको लामो समय भइसके पनि निकै सुस्त गतिमा रहेकाले काठमाडौं आइपुग्न अझै केही दिन लाग्ने मौसमविद् मानन्धरको भनाइ छ ।

“मनसुन कोसी प्रदेशको पूर्वतिर छ । यो पश्चिमतर्फ विस्तारका क्रममै छ, तर निकै सुस्त गतिमा । काठमाडौं आइपुग्न दुईदेखि तीन दिन र काठमाडौं पुगेको पाँचदेखि सात दिनपछि मात्रै सुदूरपश्चिम क्षेत्रमा पुग्ने देखिएको छ,” मौसमविद् मानन्धरले भनिन् ।

अघिल्लो वर्षको मनसुन पनि देशभर फैलिन करिब तीन हप्ता लागेको जानकारी दिँदै मानन्धरले यस वर्ष यही जुन १० तारिखका दिन मनसुन प्रवेश गरेको बताइन् । रासस