रोम । इटालीमा हालै सम्पन्न जी–७ शिखर सम्मेलनमा भारतका प्रधानमन्त्री नरेन्द्र मोदीसँगको भेटघाटपछि क्यानडाका प्रधानमन्त्री जस्टिन ट्रुडोले प्रमुख मुद्दामा क्यानडा र भारतले आपसमा सहयोग गर्ने बताएका छन् । 

यद्यपि, ती मुद्दा के हुन् भन्ने बारेमा उनले बताएनन् । भेटमा उनले भारतीय प्रधानमन्त्रीसँग सिख नेता हरदीप सिंह निज्जरको हत्याको मामिलामा कुरा भयो कि भएन भन्ने बारेमा पनि केही बताएनन् ।

क्यानडाका प्रधानमन्त्रीले निज्जरको हत्यामा भारतको हात रहेको क्यानडाको संसद्‌मा बोलेका थिए । सो भनाइपछि भारत र क्यानडाबीच तनावपूर्ण सम्बन्ध रहँदै आएको छ । 

शनिबार बिहान इटालीमा आयोजित पत्रकार सम्मेलनमा ट्रुडोले भनेका थिए, “म महत्त्वपूर्ण र संवेदनशील मुद्दामा जाँदिनँ । तर, यी मुद्दा सुल्झाउनु जरुरी छ । हाम्रो प्रतिबद्धता छ कि साथै मिलेर काम गर्नेछौँ । आउने समयमा हामी महत्त्वपूर्ण मुद्दा सुल्झाउनका लागि प्रतिबद्ध छौँ ।” बीबीसी