काठमाडौं । निर्माण व्यवसायीका गुनासालाई महालेखापरीक्षकको कार्यालयले सुन्नुपर्ने सरोकारवालाले बताएका छन् । नेपाल निर्माण व्यवसायी महासंघले आइतबार काठमाडौंमा आयोजना गरेको संवाद कार्यक्रममा सरोकारवालाले यस्तो बताएका हुन् ।

उनीहरूले निर्माण व्यवसायीका गुनासालाई पनि महालेखाले सुनुवाइ गर्न आवश्यक रहेकामा जोड दिए । निर्माण व्यवसायीको बदमासी भए पनि चित्त बुझाएर पठाउन सक्नुपर्ने उनीहरूले बताए ।

कार्यक्रममा पूर्वाधार विकास समितिका सभापति दीपकबहादुर सिंहले मुलुकमा युवा र उद्योगी–व्यवसायी समेत विदेशी भएको उल्लेख गरे । नेपालमा राजनीतिक पार्टीले डामेका उपभोक्ता समितिका ‘साँढे’बाहेक कोही नभएको उनको टिप्पणी थियो ।

उनले महालेखापरीक्षकको कार्यालयले निर्माण व्यवसायीका गुनासा सुन्न आवश्यक रहेको बताए । मुलुकमा भएको भ्रष्टाचार ‘तल’बाट नभई ‘माथि’बाट रोक्न जरुरी रहेको उनको भनाइ थियो ।

उनले नेपाल सरकारका सचिवहरूले रिटायर्ड भएको पाँच वर्षसम्म विदेशी संस्थामा काम गर्न नपाउने कानुनी व्यवस्था गर्न आवश्यक रहेको बताए । भयो । नेता–कर्मचारीका छोराछोरी सबै विदेश गएका र निर्माण व्यवसायी मात्र देशमा रहेका उनको बुझाइ छ ।

नेपाल निर्माण व्यवसायी महासंघका अध्यक्ष रवि सिंहले बेरुजुमा निर्माण व्यवसायी तेस्रो पक्ष नभएको बताए । उनले बेरुजुले निर्माण व्यवसायीलाई प्रत्यक्ष असर पर्ने उल्लेख गरे ।

बेरुजु फर्छ्योट भनेर असुलउपर गर्ने प्रक्रिया गलत रहेको उनको धारणा छ । निर्माण व्यवसायीको घरखेत गएर समाप्त भइरहेको उनले जिकिर गरे । उनले डकुमेन्ट बन्ने प्रक्रियालाई सुधार नगरी निर्माण कम्पनीलाई आर्थिक नोक्सानी पुर्‍याउने काम भइरहेको बताए । न्युज एजेन्सी नेपाल