काठमाडौं । नेपाली कांग्रेसका सांसद रामकृष्ण यादवले मनसुनजन्य विपद् पूर्वतयारीबारे सरकारको जवाफ माग गरेका छन् । बिहीबार प्रतिनिधिसभा बैठकमा उनले यस्तो माग गरेका हुन् ।

उनले यो वर्ष मनसुनजन्य विपद्बाट देशभर १८ लाख एक हजार जनसंख्या, ८४ लाख १२ हजार घरधुरी प्रभावित हुन सक्ने आकलन गरिएको बताए ।

उनले राष्ट्रिय विपद् जोखिम न्यूनीकरण तथा व्यवस्थापन प्राधिकरणको मनसुन पूर्वतयारी तथा प्रतिकार्य राष्ट्रिय कार्ययोजना, २०८१ अनुसार ८३ हजार घरपरिवार प्रत्यक्ष रूपमा प्रभावित हुन सक्ने बताइएको विषयमा सरकारको ध्यानाकर्षण गराए । तीमध्ये १८ हजार घरपरिवारलाई उद्धार तथा राहत दिनुपर्ने अनुमान गरिएको उनले उल्लेख गरे ।

“...तसर्थ, सभामुख महोदयमार्फत सरकारको पूर्वतयारी के छ यस मानेमा संसद्लाई जानकारी दिइयोस् भन्ने आग्रह गर्न चाहन्छु,” उनले भने । न्युज एजेन्सी नेपाल