![४० वर्षमा ३६ लाख चार हजार ४३७ रुपैयाँ मात्र सरकारी बेरुजु फर्छ्योट](https://12khari.top/uploads/posts/namuna-karki-dahal1-1718011289.jpg)
काठमाडौं । पछिल्लो ४० वर्षमा ३६ लाख चार हजार ४३७ रुपैयाँ मात्र बेरुजु फर्छ्योट भएको कुमारीचोक तथा केन्द्रीय तहसिल कार्यालयले जानकारी गराएको छ ।
प्रतिनिधिसभाअन्तर्गतको सार्वजनिक लेखा समितिको बैठकमा सोमबार आर्थिक वर्ष २०१८/१९ देखि २०५९/६० मा उक्त बेरुजु फर्छ्योट भएको कुमारीचोक तथा केन्द्रीय तहसिल कार्यालयका प्रमुख नमुना कार्की दाहालले जानकारी दिइन् । प्रमुख कार्कीले लगत कट्टा रकम हेर्दा कार्यालयको कार्यक्षमता कमजोर देखिएको स्वीकार गरिन् ।
उनले अहिलेसम्म एक अर्ब ८८ करोड ७० लाख ६ हजार रुपैयाँ मात्र बेरुजु फर्छ्यौट गर्न सफल भएको बताइन् । आर्थिक वर्ष २०१८/१९ देखि २०५९/६० सालसम्मको सरकारी कार्यालय वा मन्त्रालयगत बेरुजु १५ अर्ब नौ करोड ६ लाख ४२ हजार ५०३ रुपैयाँ रहेको उनले उल्लेख गरिन् ।
राष्ट्रिय योजना आयोगको सचिवालयसहित २८ मन्त्रालयको फर्छ्योट हुन बाँकी बेरुजु चालुसहित विगत ४० वर्षमा १५ अर्ब ९ करोड पुगेको उनले बताइन् ।
उनले कार्यालयमा बेरुजु फर्छ्योट नगर्ने व्यक्तिलाई थुनामा राख्न सक्ने अधिकार भए पनि उपसचिवको नेतृत्वलगायत कर्मचारीको अभावका कारण सोचेजस्तो काम गर्न नसकिएको बताइन् । न्युज एजेन्सी नेपाल