काठमाडौं । नेकपा (एकीकृत समाजवादी)का अध्यक्ष माधवकुमार नेपालले जनताको बहुदलीय जनवाद (जबज)को मार्गदर्शक सिद्धान्तमा चलेकामा नेकपा (एमाले)का अध्यक्ष केपी शर्मा ओलीलाई दोष दिन नहुने बताएका छन् । आइतबार काठमाडौंमा आयोजित ‘नेपालमा समाजवादी क्रान्ति’ विषयक अन्तरक्रिया कार्यक्रममा उनले पार्टीको महाधिवेशनले नै पारित गरेकाले त्यही विचारलाई अघि सारेकामा दोष दिन नमिल्ने उल्लेख गरे ।

उनले अरू दलले समाजवादी कार्यक्रम अघि सार्न नसकेको टिप्पणी गरे । “हाम्रो पार्टीले समाजवादी क्रान्तिको कार्यक्रम लिनुपर्छ भन्ने विचार अघि सार्‍यो । अरू पार्टीले भन्न सकेका छैनन् । हिजो आठौँ, नवौँ महाधिवेशनले धेरै गलत कुरा अगाडि सार्‍यो, जनताको बहुदलीय जनवादलाई मार्गदर्शक सिद्धान्त भनेर । अनि, त्यही मार्गदर्शक सिद्धान्तमा केपी ओली चलिरहेका छन्, केपी ओलीलाई के दोष दिनु ? महाधिवेशनले पास गरिसकेपछि उनलाई दोष दिने कुरो पनि भएन । त्यो बेलामा गलत विचार अगाडि सारिएको थियो । तर, हामीले मार्गदर्शक सिद्धान्त भन्ने पनि होइन,” नेता नेपालले भने, “त्यसको औचित्य समाप्त भयो भनेर...। त्यसका कतिपय पक्ष छन्, बहुदलीय प्रतिस्पर्धा र लोकतान्त्रिककरणको पक्ष छ । यी पक्षलाई बेवास्ता गर्ने होइन ।”

उनले मदन भण्डारी, मनमोहन अधिकारीलाई सम्मान गर्दै अघि बढ्नुपर्नेमा जोड दिए । समाजवादी मोर्चा नयाँ ढंगले अघि बढाउने विषयमा छलफल भइरहेको उनले बताए ।

चीन, क्युबा, भियतनाम, उत्तर कोरियाको समाजवाद कस्तो छ भनेर गहिरो अध्ययन गर्नुपर्ने उनले उल्लेख गरे । उनले समाजवादी क्रान्तिमा बहुदलीय प्रतिस्पर्धा हुने बताए ।

“समाजवादी क्रान्ति एकदलीय तानाशाही हुँदैन । त्यहाँ पनि बहुदलीय प्रतिस्पर्धा हुन्छ,” उनले भने ।

सोही कार्यक्रममा पार्टीका सम्मानित नेता झलनाथ खनालले समाजावादी क्रान्तिको युगमा जबज मार्गदर्शक सिद्धान्त भन्नु लज्जास्पद रहेको बताएका थिए ।

• जबज मार्गदर्शक सिद्धान्त भन्नु लज्जास्पद : झलनाथ खनाल