नयाँ दिल्ली । भारतीय राष्ट्रिय कांग्रेसको संसदीय दलको अध्यक्षमा सोनिया गान्धीलाई सर्वसम्मत चयन गरिएको कांग्रेस नेता तथा सांसद प्रमोद तिवारीले शनिबार बताएका छन् ।

तिवारीले एएनआईसँग भने, “सोनिया गान्धीलाई कांग्रेस संसदीय दलको अध्यक्षमा सर्वसम्मत चयन गरिएको छ ।”

कांग्रेसका अध्यक्ष मल्लिकार्जुन खड्गेले आफ्नो पार्टीको संसदीय दलको अध्यक्षका निम्ति बैठकमा सोनिया गान्धीको नाम प्रस्ताव गरेका थिए । पार्टीका नेता गौरव गोगोई, तारिक अनवर र के सुधाकरनले प्रस्तावको समर्थन गरेका थिए ।

कांग्रेस संसदीय दलको बैठक नयाँ दिल्लीस्थित संसद्को केन्द्रीय हलमा सम्पन्न भएको छ । युनाइटेड प्रोग्रेसिभ एलाएन्सका अध्यक्ष सोनिया गान्धी, राहुल गान्धी, पार्टी अध्यक्ष मल्लिकार्जुन खड्गे, महासचिव केसी वेणुगोपाललगायत प्रमुख कांग्रेस नेता बैठकमा उपस्थित थिए ।

कांग्रेस संसदीय दलको बैठकमा कार्ति चिदम्बरम, राजीव शुक्ला, रणदीप सुरजेवाला, अजय माकन, पञ्जाबका पूर्वमुख्यमन्त्री चरणजीत सिंह चन्नी र शशी थरुर पनि सहभागी थिए ।

कांग्रेस कार्यसमितिले पार्टीका सांसद राहुल गान्धीलाई लोकसभामा विपक्षी दलको नेतामा नियुक्त गर्नुपर्ने प्रस्ताव पारित गरेको छ । राहुलले उत्तर प्रदेशको रायबरेली र केरलाको वायनाडबाट लोकसभा चुनाव जितेका थिए ।

• राहुल गान्धी भारतको विपक्षी दलका नेता नियुक्त

कांग्रेसलगायत विपक्षी दलहरूको समूह भारतीय राष्ट्रिय विकास समावेशी गठबन्धन (इन्डिया)ले भारतीय जनता पार्टी (भाजपा)लाई लोकसभामा एकल बहुमत प्राप्त गर्नबाट रोक्न सफल भएको छ । यद्यपि, भाजपा नेतृत्वको गठबन्धन राष्ट्रिय लोकतान्त्रिक गठबन्धन (एनडीए)ले २९३ सिट जितेको छ ।

सन् २०२४ को लोकसभा चुनावमा भाजपाले २४० सिट जितेको छ । तर, यो संख्या एकल बहुमतका निम्ति संसद्‌मा आवश्यक सदस्य संख्याभन्दा ३२ सदस्यले कमी हो ।

अर्कोतर्फ, कांग्रेसले ९९ सिट जितेर बलियो सुधार गरेको छ । विपक्षी गठबन्धनले २३० सिट पार गरेको छ । रासस/एएनआई