नयाँ दिल्ली । भारतमा विपक्षी दल कांग्रेसका नेता राहुल गान्धी सत्तारूढ भाजपामाथि मानहानिको विषयलाई लिएर आफूविरुद्ध परेको मुद्दामा कर्णाटकस्थित विशेष अदालतमा शुक्रबार (आज) जाने भएका छन् ।

समाचार एजेन्सी एएनआईले राहुल दिल्लीस्थित विमानस्थलमा पुगेको तस्बिर केही समयअघि सार्वजनिक गरेको छ । त्यहाँबाट उनी बैंगलुरु प्रस्थान गर्ने जनाइएको छ ।

अघिल्लो वर्ष कर्णाटकको विधानसभा निर्वाचनका क्रममा उक्त राज्यको तत्कालीन भाजपा सरकारले व्यापक भ्रष्टाचार गरेको राहुलले आरोप लगाएका थिए । कांग्रेसले यस विषयलाई लिएर ठूलो विज्ञापन पत्रपत्रिकामा पनि छपाएको थियो ।

त्यसपछि कर्णाटकस्थित भाजपा नेतृत्वले राहुल, सिद्धारमैया र डीके शिवकुमारका विरुद्धमा मानहानिको मुद्दा दर्ता गराएको थियो ।

विशेष अदालतले उक्त मामिलामा अहिले राज्यका मुख्यमन्त्री सिद्धारमैया र उपमुख्यमन्त्री डीके शिवकुमारलाई जुन १ मा जमानत दिइसकेको छ । हाल कर्णाटकमा कांग्रेसकै सरकार छ । बीबीसी हिन्दीबाट ।