काठमाडौं । क्यानडाका प्रधानमन्त्री जस्टिन ट्रूडोले तेस्रोपटक भारतको प्रधानमन्त्री बन्न लागेकोमा नरेन्द्र मोदीलाई बधाई दिएका छन् । 

क्यानडाका प्रधानमन्त्रीले दिएको बधाई सन्देशमा भनिएको छ, “निर्वाचनमा विजय प्राप्त गरेकोमा प्रधानमन्त्री नरेन्द्र मोदीलाई बधाई । क्यानडा दुवै देशका जनताबीच मानवअधिकार, विविधता र कानुनी शासनमा आधारित सम्बन्धलाई अघि बढाउन मोदी सरकारसँग काम गर्न तयार छ ।”  बधाई सन्देशमा क्यानडामा १३ लाख हिन्दु समुदाय रहेको ट्रूडोले उल्लेख गरेका छन् । 

सात चरणमा भएको लोकसभा निर्वाचनमा भारतीय जनता पार्टी (भाजपा)ले २४० सिटमा जितेको छ । भाजपा नेतृत्वको एनडीए गठबन्धनले २९३ सिट जितेको छ भने भारतीय राष्ट्रिय कांग्रेस नेतृत्वको इन्डिया गठबन्धनले २३४ सिट जितेको छ । 

एक्लै महुमत नल्याएपछि मोदीले पुनः एनडीए गठबन्धनको समर्थनमा नयाँ सरकार बनाउने तयारी गर्दै छन् । गत वर्ष हरदीप सिंह निज्जरको क्यानडामा हत्या भएपछि दुई देशबीच तनाव बढेको थियो । क्यानडाले निज्जरको हत्यामा भारत सरकारको हात रहेको बताउँदै आएको छ । भारतले भने उक्त आरोपलाई अस्वीकार गरेको छ ।