काठमाडौं । भारतमा एनडीए गठबन्धनले बहुमत हासिल गरेकोमा प्रधानमन्त्री पुष्पकमल दाहाल ‘प्रचण्ड’ले भारतका प्रधानमन्त्री नरेन्द्र मोदीलाई बधाई दिएका छन्। सामाजिक सञ्जाल एक्समार्फत प्रधानमन्त्री प्रचण्डले मोदीलाई बधाई दिएका हुन् । 

जवाफमा मोदीले शुभेच्छाका लागि प्रधानमन्त्री प्रचण्डलाई धन्यवाद भनेका छन् । उनले आफू भारत—नेपाल सम्बन्धलाई अझ बलियो बनाउन निरन्तर सहयोगका लागि प्रतिक्षारत रहेको समेत जनाएका छन् ।  

मोइजुले पनि दिए बधाई

भारतसँग राम्रो सम्बन्ध नरहेको मानिने माल्दिभ्सका राष्ट्रपति मोहम्मद मोइजुले भारतीय लोकसभामा बहुमत ल्याएकोमा एनडीए गठबन्धनलाई बधाई दिएका छन् ।

प्रधानमन्त्री मोदीले जवाफमा माल्दिभ्सका राष्ट्रपतिलाई धन्यवाद दिँदै माल्दिभ्सलाई महत्त्वपूर्ण साझेदार भएको जनाएका छन् ।

माल्दिभ्सका राष्ट्रपतिले एक्समा भनेका छन्, “प्रधानमन्त्री मोदीको अगुवाइमा भाजपा र एन्डीए गठबन्धनलाई २०२४को लोकसभा निर्वाचनमा जित हासिल गरेकोमा बधाई । म दुवै देशको साझा विकासका र हितको लागि साथ मिलेर काम गर्न उत्सुक छु ।”

जवाफमा मोदीले भनेका छन्, “माल्दिभ्स भारतको महत्त्वपूर्ण साझेदार र छिमेकी हो । हाम्रो प्रयास दुवै देशको सम्बन्ध मजबुत गर्नका लागि काम गर्नु रहनेछ ।”