काठमाडौं । भारतीय राष्ट्रिय कांग्रेसका नेता राहुल गान्धीले नरेन्द्र मोदी र अमित शाहलाई भारतीय जनताले अस्वीकार गरेको सन्देश दिएको बताएका छन् ।

निर्वाचन परिणाम आउने क्रम जारी रहँदा दिल्लीमा रहेको पार्टी कार्यालयमा मंगलबार पत्रकार सम्मेलन गर्दै उनले संविधान बचाउने जिम्मेवारी गरिब जनताले लिएको उल्लेख गरे । “आरक्षणमा विजेजपीले आक्रमण गर्‍यो । देशले अमित शाह र नरेन्द्र मोदी यो देश चलाउन हामीलाई चाहिँदैन भनेर स्पष्ट सन्देश दियो,” उनले भने ।

लोकसभा निर्वाचनको नतिजा संविधान बचाउने पहिलो र ठूलो कदम भएको गान्धीले पत्रकार सम्मेलनमार्फत जानकारी दिए ।
“लडाइँ सविधान बचाउनेको थियो । हाम्रो बैंक खाता क्यान्सिल गरे मुख्यमन्त्रीलाई जेलमा हाले पार्टी फुटाए मेरो दिमाग पहिले देखिनै थियो कि हिन्दुस्थानका जनता संविधान बचाउन एकसाथ लड्छ भन्ने मलाई विश्वास थियो । त्यो आज भयो,” उनले भने, “बवरशेर कार्यकर्तालाई र मतदातालाई धन्यवाद । संविधान बचाउने पहिलो र सबैभन्दा ठूलो कदम लिनुभयो ।”

उनले  इन्डिया गठबन्धन एकअर्काको सम्मान गर्दै एक भएर लडेकाले नतिजा सकारात्मक आएको बताए । साथै उनले गठबन्धनले भारतमा नयाँ भिजन प्रवाह गरेको पनि उल्लेख गरे । अब सरकार बनाउनुहुन्छ कि प्रतिपक्षमा रहनुहुन्छ भन्ने प्रश्नमा उनले स्पष्ट जवाफ दिएनन् । उनले पहिले गठबन्धनको बैठक बस्ने र निर्णय लिने जानकारी दिए । “आज मसँग यसको जवाफ छैन । भोलि यसको जवाफ हुनेछ,” उनले भने, “गठबन्धनको भोलि बैठक बस्छौँ र निर्णयमा पुग्छौँ ।”

यस्तै, कांग्रेस अध्यक्ष मल्लिकार्जुन खड्गेले यसलाई जनताको जितको संज्ञा दिए । उनले मोदीले अर्को हमला लोकतन्त्र र संविधानमाथि गर्ने भन्दै संविधान रक्षाको लडाई जारी रहने बताए ।