काठमाडौं । लोकतान्त्रिक समाजवादी पार्टी (लोसपा), नेपालको बैठकमा मधेस प्रदेशको राजनीतिक अवस्थाको समीक्षा गरिएको छ । मंगलबार जनकपुरमा अध्यक्ष महन्थ ठाकुरसहितका नेताहरूले मधेसको राजनीतिक अवस्थाको समीक्षा गरेका हुन् ।

नेकपा (एमाले) र नेकपा (माओवादी केन्द्र)ले मधेस सरकारलाई दिएको समर्थन फिर्ता लिएपछि उत्पन्न राजनीतिक परिस्थति र पार्टीको भूमिकाका विषयमा उक्त बैठकमा छलफल गरिएको थियो ।

अध्यक्ष ठाकुर र वरिष्ठ नेता शरतसिंह भण्डारीको उपस्थितिमा प्रदेशसभाका आठ सदस्यसँग राजनीतिक विषयवस्तुको समीक्षा गरिएको लोसपाका मधेस प्रदेश अध्यक्ष जितेन्द्र सोनलले जानकारी दिए । बैठकमा कुनै खासै निर्णय भने नभएको उनले बताए ।

मुख्यमन्त्री सरोजकुमार यादवले बुधबार (भोलि) प्रदेशसभाबाट विश्वासको मत लिने तय छ । त्यसबारे समेत बैठकमा समीक्षा गरिएको र पार्टीले उचित निर्णय लिने उनले बताए । न्युज एजेन्सी नेपाल