साना (यमन) । यमनमा अमेरिका र बेलायतले हालै गरेको घातक आक्रमणको जवाफमा हुथी समूहले लालसागरमा अमेरिकाको जहाजमा मिसाइल प्रहार गरेको छ ।

यमनको होदेइदाह प्रान्तमा अमेरिका र बेलायतको संयुक्त आक्रमणमा कम्तीमा १६ जनाको मृत्यु भएको समूहको दाबीपछि हुथी सैन्य प्रवक्ता याह्या सारीले शुक्रबार आइसेनहावर जहाजमा आक्रमणको घोषणा गरेका थिए ।

हुथी नियन्त्रित च्यानल अल मासिराह टेलिभिजनले बिहीबारको आक्रमणको नतिजा खुलासा गर्दै होदेइदाहमा घाइते नागरिकको उपचार भइरहेको फुटेज प्रसारण गरेको थियो । उक्त आक्रमणमा कम्तीमा ४२ जना घाइते भएका बताइएको छ ।

“अमेरिकी–बेलायती आक्रमणले हामीलाई प्यालेस्टाइनको समर्थनमा हाम्रो सैन्य कारबाही जारी राख्नबाट रोक्न सक्दैन । विद्रोहीले बढ्दो तनावको सामना गर्नुपर्नेछ,” हुथी अधिकारी मोहम्मद अल–बुखाइतीले सामाजिक सञ्जाल एक्समा भनेका छन् ।

बेलायती प्रधानमन्त्री ऋषि सुनकले आक्रमणलाई ‘हुथीविरुद्धको आत्मरक्षाको एकरूप’ रहेको बताए ।

इरान समर्थित हुथी समूहले पश्चिमी समर्थित र साउदी नेतृत्वको गठबन्धनविरुद्ध लगभग एक दशकको द्वन्द्वपछि यमनको महत्त्वपूर्ण भागलाई नियन्त्रण गरेको हो । गाजामा इजरायल–हमास द्वन्द्वबीच उनीहरूले प्यालेस्टाइनीलाई समर्थन गरेका छन् ।

उनीहरूले नोभेम्बरदेखि लालसागर, बाब अल–मन्डेब जलडमरूमध्य र एडनको खाडीमा जहाजमा बारम्बार ड्रोन र मिसाइल आक्रमण गरेका छन् ।

इरानले अमेरिका–बेलायतको आक्रमणलाई ‘यमनको सार्वभौमिकता र क्षेत्रीय अखण्डता, अन्तर्राष्ट्रिय कानुन र मानवअधिकारको उल्लंघन’ भन्दै निन्दा गरेको छ ।

“आक्रमणकारी अमेरिका र बेलायती सरकार यमनी जनताविरुद्धको यी अपराधको परिणामका लागि जिम्मेवार छन्,” इरानी विदेश मन्त्रालयका प्रवक्ता नासिर कनानीले भने ।

अमेरिकी समुद्री प्रशासनका अनुसार हुथीहरूले ढुवानी जहाजमा ५० भन्दा बढी आक्रमण गरेका छन् । उनीहरूले ढुवानी कम्पनीलाई वैकल्पिक मार्ग खोज्न बाध्य पारेका छन् । त्यसले लालसागर पार गर्ने विश्वव्यापी व्यापारको लगभग १२ प्रतिशतलाई असर गरेको छ ।

हुथीको क्षमतालाई घटाउने उद्देश्यले अमेरिका र बेलायतले संयुक्त हमला गरे पनि विद्रोहीले आफ्नो आक्रमण जारी राखेका छन् । आफ्नो पछिल्लो कारबाहीमा उनीहरूले गाजामा इजरायली आक्रमणको प्रतिक्रियामा ग्रीसको स्वामित्वमा रहेको ढुवानी जहाज र अरू जहाजमाथि आक्रमण गरेको अलजजिराले जनाएको छ । रासस/एएनआई