काठमाडौं । नेपाली कांग्रेस सहकारीको रकम हिनामिनाबारेको छानबिनमा गृहमन्त्री रवि लामिछानेको नाम तोक्नैपर्ने 'अडानबाट पछि हटेको' छ ।

सोमबार साँझ संसदीय समितिको कार्यादेश (टीओआर) तोक्न गठित कार्यादलको बैठकमा कांग्रेस लचिलो बनेकोतर्फ कानुनमन्त्री पदम गिरीले संकेत गरे ।

"नाम उल्लेख गर्न हुँदैन भनेर हामीले पहिला पनि कुरा उठाएका थियौँ । निश्चित कम्पनीको नाम उल्लेख हुन्छ, जो कोही छानबिनमा तानिन्छन् । उनीहरूलाई गल्ती गरेको छ भने कारबाही हुन्छ, नाम उल्लेख नगर्ने कुरामा प्रमुख प्रतिपक्षी दल सहमत भएको भन्न सक्छौँ," उनले भने ।

नेपाली कांग्रेसका प्रमुख सचेतक रमेश लेखकले पनि नाम तोक्ने अडानबाट पछि हटेको संकेत गरे । उनले गृहमन्त्री लामिछानेको नाम जोडिएका सबै सहकारीको नाम लेखिने भएकाले संलग्न सबैमाथि छानबिन हुने बताए ।

"रकम हिनामिना गर्ने सबै सहकारी संस्थाको नाम लेख्ने र ती सहकारीको छानबिन गर्ने भएपछि अपचलनमा संलग्न सबै पर्छन् । उनीहरूमाथि छानबिन हुन्छ," लखेकले बाह्रखरीसँग भने ।

कार्यदलबाट कार्यादेशको अन्तिम टुंगो लगाउन मंगलबार बिहान ११ बजे फेरि बैठक बस्ने कानुनमन्त्री गिरीले बताए । उनले भोलिबाट सदनका नियमित कामहरू निर्वाधरूपमा अगाडि बढ्ने पनि बताए ।