![एक वर्षमै थपियो एक खर्ब २७ अर्ब बेरुजु, संघमा सबैभन्दा बढी अर्थ मन्त्रालयको](https://12khari.top/uploads/posts/mahalekha-parichhakko-office1-1716723936.jpg)
काठमाडौं । पछिल्लो एक वर्षमा एक खर्ब २७ अर्ब ७४ करोड रुपैयाँ बेरुजु थपिएको छ । महालेखापरीक्षकको कार्यालयको ६१औँ वार्षिक प्रतिवेदन आइतबार सार्वजनिक गर्दै महालेखापरीक्षक तोयम रायले यस्तो बताएका हुन् ।
आर्थिक वर्ष २०७९/८० मा पाँच हजार ६०५ कार्यालयको ७८ खर्ब ८१ अर्ब रुपैयाँको लेखापरीक्षण गरिएको थियो । त्यसमध्ये संघीय सरकारको २४ खर्ब ६१ अर्ब, प्रदेशको तीन खर्ब २३ अर्ब र स्थानीय तहको ११ खर्ब ३९ अर्बको लेखापरीक्षण गरिएको थियो ।
तीन तहका सरकार, समिति र कार्यालयको गरी एक खर्ब २७ अर्ब ७४ करोड बेरुजु औँल्याइएको छ ।
हालसम्मको अध्यावधिक बेरुजु ६ खर्ब ६९ अर्ब र कारबाही गरेर टुंगो लगाउनुपर्ने पाँच खर्ब १३ अर्ब गरी कुल बेरुजु ११ खर्ब ८३ अर्ब २६ करोड पुगेको छ ।
संघीय सरकारमा सबैभन्दा धेरै बेरुजु अर्थ मन्त्रालयको छ । अर्थको २५ अर्ब ४७ करोड, दोस्रोमा भौतिक पूर्वाधार तथा यातायातको १२ अर्ब र तेस्रोमा सञ्चार तथा सूचना प्रविधि मन्त्रालयको तीन अर्ब १२ करोड बेरुजु रहेको महालेखापरीक्षकको कार्यालयले जनाएको छ ।