धुलिखेल । प्रधानन्यायाधीश विश्वम्भरप्रसाद श्रेष्ठले सक्षम न्यायपालिका र स्वतन्त्र प्रेस एक अर्काका परिपूरक हुने बताएका छन् । सर्वोच्च अदालत र न्यायिक पत्रकार मञ्चले गरेको कार्यक्रममा प्रधानन्यायाधीश श्रेष्ठले यी दुईको स्वतन्त्र र व्यावसायिक अस्तित्वले नै लोकतन्त्र र विधिको शासन बलियो हुने बताए ।

"हामी सबैलाई थाहा छ, न्यायपालिका र स्वतन्त्र सञ्चारमाध्यमबिना लोकतन्त्र सबल बन्न सक्दैन," प्रधानन्यायाधीश श्रेष्ठले भने, "स्वतन्त्र न्यायपालिकाबिनाको प्रेस स्वतन्त्रता वा स्वतन्त्र प्रेसबिनाको न्यायपालिका परिकल्पना गर्न सकिँदैन ।"

उनले न्यायपालिकाको संवेदनशील काम कारबाहीमा पत्रकारिता क्षेत्रले व्यावसायिकता नअपनाइदिने र  संवेदनशील नभइदिने हो भने यसले न्यायपालिकाको आस्था र विश्वास घटाउन सक्नेतर्फ सचेत गरे ।

"न्यायपालिकाको संवेदनशीलता सञ्चारमाध्यमले ध्यान दिनु वाञ्छनीय हुन्छ । किनभने न्यायपालिकाका कामकारबाहीका समाचारकै आधारमा न्यायपालिकाप्रतिको दृष्टिकोण निर्माण हुने हुँदा प्रेस जिम्मेवार र संवेदनशील हुनुपर्छ," श्रेष्ठले भने, "न्यायपालिकाको विचाराधीन मुद्दा प्रभावित हुने गरी वा न्यापालिकाको आस्था घट्ने गरी प्रेसले अघि बढ्नु हुँदैन ।"