काठमाडौं । नेपाली राष्ट्रिय फुटबल टिमको सहायक प्रशिक्षकमा चेतन घिमिरे नियुक्त भएका छन् ।

अखिल नेपाल फुटबल संघ (एन्फा)ले शुक्रबार टिमको सहायक प्रशिक्षकको जिम्मेवारी घिमिरेलाई र गोलकिपर प्रशिक्षकको जिम्मेवारी मनिष तिमल्सिनालाई सुम्पिएको हो ।

उनीहरू यसअघि सहायक प्रशिक्षक रहेका प्रवेश कटुवाल र गोलकिपर प्रशिक्षक विनोद डंगोलको स्थानमा आएका हुन् ।

नेपाली टिमले फिफा विश्वकप छनोट–२०२६ अन्तर्गत दोस्रो चरणमा जुन ६ मा युनाइटेड अरब इमिरेट्स (यूएई) र जुन ११ मा यमनविरुद्ध खेल्ने तालिका छ । यी दुवै खेल साउदी अरेबियामा हुनेछन् ।

यसअघि यूएईविरुद्धको खेल नेपालमा हुने तालिका रहे पनि एसियन फुटबल महासंघ (एएफसी)ले दशरथ रंगशाला अयोग्य रहेको बताएपछि खेल 'तटस्थ भूमि'मा सरेको हो ।

छनोटको समूह ‘एच’मा रहेको नेपालले हालसम्म चार खेल खेले पनि अंकको खाता खोल्न सकेको छैन ।