लन्डन । बेलायतका प्रधानमन्त्री ऋषि सुनकले बेलायत अहिले चौरस्तामा रहेको बताएका छन् । आउँदो केही वर्ष बेलायतलाई इतिहासमै सबैभन्दा चुनौतीपूर्ण हुने उनले उल्लेख गरे ।

उनले बेलायत इतिहासमै अहिले सबैभन्दा खतरनाक अवस्थामा रहेको समेत जनाए । सोमबार मध्य लन्डनमा मतदातालाई ‘प्रि इलेक्सन’ सम्बोधन गर्दै उनले यस्तो बताएका हुन् ।

केही ‘बोल्ड’ विचारले नै थप सुरक्षित भविष्य बनाउन सक्ने जनाउँदै उनले आफू त्यसका निम्ति उपयुक्त भएको जिकिर गरे । स्थानीय निर्वाचनमा उनको कन्जरभेटिभ पार्टीले पराजय भोग्नुपरेपछि सुनकले यो सम्बोधनमार्फत मतदातालाई आश्वस्त पार्ने प्रयास गरेका हुन् ।

विपक्षी लेबर पार्टीले कन्जरभेटिभ अर्थात् टोरिजलाई बेलायतका समस्या समाधान गर्न नसक्ने बरु ‘उनीहरू नै समस्या’ भएको जनाउँदै आएको छ ।

सुनकले आउँदा दिन बेलायतका निम्ति युद्धको धम्की, आप्रवासी तथा प्रविधिजस्ता विषयबाट चुनौती रहेको औँल्याएका छन् । ती चुनौती सामनाका निम्ति देशको नेतृत्वबारे कठिन छनोट गर्न उनले मतदातालाई आग्रह गरे ।

उनले आउँदो पाँच वर्षमा बितेका ३० वर्षको भन्दा धेरै परिवर्तन हुने भएकाले त्यसबारेमा ध्यान जान जरुरी भएको समेत बताए ।

विदेश नीतिबारे उनले चीन, रुस, उत्तर कोरिया र इरान अधिनायकवादको मुख्य आधारका रूपमा रहने उल्लेख गरे । आउँदा दिनमा आप्रवासी र आर्टिफिसियल इन्टेलिजेन्स पनि विश्वव्यापी चुनौतीको विषय हुने उनले बताए ।

उनले युरोपियन कन्भेन्सन अन हुमन राइट्स (ईसीएचआर)बाट पनि आवश्यकता परे बेलायतले सदस्यता फिर्ता लिनुपर्ने जनाए । बेलायतमा शरण लिन चाहने व्यक्तिलाई रुवान्डामा पठाउने बेलायती नीतिमा  ईसीएचआरले अवरोध प्रयास गरिरहेको भन्दै उनले असन्तुष्टि व्यक्त गरे ।

राष्ट्रिय ‘पोलिङ’का क्रममा लेबर पार्टी कन्जरभेटिभभन्दा २० प्वाइन्टले अगाडि रहेको देखाइएको थियो । सुनकले देशलाई अघि बढाउन आफूले मात्र सक्ने जिकिर गरे । बेलायतमा यो वर्षको अन्त्यमा निर्वाचन हुने सम्भावना रहे पनि मिति तोकिएको छैन । सीएनबीसीबाट ।