नयाँ दिल्ली । भारतका प्रधानमन्त्री नरेन्द्र मोदीले भारत स्वतन्त्र भएपछि सबैभन्दा बढी महंगी इन्दिरा गान्धीको पालामा भएको आरोप लगाएका छन् । सोमबार एक समाचार च्यानललाई अन्तर्वार्ता दिने क्रममा विपक्षीले महंगी, बेरोजगारी र नोकरीको विषयमा प्रधानमन्त्री नबोलेको भन्ने आरोप लगाएको बारेमा सोधिएको प्रश्नको जवाफ दिँदै प्रधानमन्त्री मोदीले सो बताएका हुन् ।

जवाफ दिने क्रममा मोदीले आफूले एलईडी बल्ब ल्याएको र यसले हरेक परिवारको बिजुलीको बिल औसत रूपमा कम भएको जनाएका छन् । “जब उनको सरकार थियो, अढाइ लाखसम्म कर तिर्नुपर्दैनथ्यो । आज सात लाखसम्म आय कर तिर्नुपरेको छैन । अर्थात् हजारौं रुपैयाँ बचत भइरहेको छ,” उनले भनेका छन्, “हामी पाँच लाख रुपैयाँसम्मको निःशुल्क उपचार गराउँछौँ । आज जुन औषधि बजारमा १०० रुपैयाँमा पाइन्थ्योे, त्यसलाई हामी अहिले २० वा १० रुपैयाँमा दिइरहेका छौँ । यसले गर्दा जनतालाई आर्थिक भार कम भइरहेको छ । ८० करोड मानिसले निःशुल्क अनाज पाइरहेका छन् ।”

उनले देशमा सबैभन्दा बढी महंगी इन्दिरा गान्धीको पालामा भएको बताउँदै  सोही क्रममा जवाहरलाल नेहरू र राजीव गान्धीको पनि नाम लिए । प्रधानमन्त्री मोदीले भने, “तपाईं जवाहरलाल नेहरू, इन्दिरा गान्धी र राजीव गान्धीको लाल किल्लाको भाषण सुन्नुस् । हाम्रो जवाफ सुन्नु पर्दैन । लाल किल्लामा पण्डित नेहरूले देशमा महंगी ज्यादै बढेको बताएका छन् ।  तपाईंहरूलाई थाहा हुनुपर्छ कि नर्थ र साउथ कोरियाको लडाईं भइरहेको छ, यसले गर्दा महंगी बढिरहेको छ ।”

अझै प्रधानमन्त्री मोदीले भने, “त्यो बेलामा ग्लोबलाइजेसन नै थिएन । उत्तर र दक्षिण कोरियाको लडाईंले कुनै पनि देशको अर्थतन्त्रमा  प्रभाव पर्ने अवस्था थिएन । त्यो समयमा पनि बहाना बनाइन्थ्यो । अहिले भइरहेका लडाईंले इन्धन, खाद्यान्नलगायतमा असर पारिरहेको हुन्छ ।” 

यस परिस्थितिमा आफ्नो सरकारले पेट्रोलियम पदार्थको मूल्य नियन्त्रणमा राखेका र महंगी बढ्न नदिएको प्रधानमन्त्री मोदीको दाबी छ । बीबीसी