काठमाडौं । जर्मन बुन्डेसलिगा च्याम्पियन बायर लेभरकुजेनले लगातार ५०औँ खेलसम्म आफ्नो अपराजित यात्रा कायम राखेको छ । आइतबार राति भएको खेलमा लेभरकुजेनले बोचुमविरुद्ध ५–० को फराकिलो जित निकालेको हो ।

लेभरकुजेनलाई जित दिलाउन प्याट्रिक सेक, भिक्टर बोनिफेस, ज्यामिन आद्ली, जोसेफ स्टानिसिक र एलेक्स ग्रिमाल्डोले गोल गरे । खेलको ४१औँ मिनेटमा सिकले गोल गर्दै लेभरकुजेनलाई अग्रता दिलाएका थिए । पहिलो हाफको इन्ज्युरी समयमा बोनिफेसले गोल गर्दै अग्रता दोब्बर पारे ।

७६औँ मिनेटमा आद्लीले गोल गरेपछि लेभरकुजेनको अग्रता ३–० मा पुगेको थियो । ८६औँ मिनेटमा स्टानिसिकले गोल गर्दा लेभरकुजेनको अग्रता ४–० मा पुग्यो । इन्ज्युरी समयमा ग्रिमाल्डोले गोल गरेपछि लेभरकुजेनले ५–० को जित निश्चित गरेको हो ।

बुन्डेसलिगाको उपाधि निश्चित गरिसकेको लेभरकुजेनले ३३ खेलबाट ८७ अंक जोडेको छ । समान खेलबाट ३३ अंकको बोचुम तालिकाको १४औँ स्थानमा छ ।