विराटनगर । कोसी प्रदेशमा नेपालको संविधानको धारा १६८ को उपधारा ५ बमोजिम नयाँ सरकार गठन गर्न आह्वान भएपछि नेकपा एमाले संसदीय दलका नेता हिक्मत कार्कीले मुख्यमन्त्रीमा दाबी पेस गर्ने तयारी गरेका छन् । यता, सरकारका मुख्यमन्त्री केदार कार्की भने प्रदेश प्रमुखको कदम संविधानविपरीत भएको दाबीसहित यसलाई बदर गराउन माग गर्दै बिहीबार (आजै) सर्वोच्च अदालतमा रिट दायर गर्न काठमाडौ गएका छन् । 

मुख्यमन्त्री कार्कीले भने, “उपधारा ५ बमोजिमको सरकारले विश्वासको मत प्राप्त गरेको दुई वर्षसम्म अविश्वास प्रस्ताव ल्याउन नसक्ने प्रावधानलाई मिचेर आह्वान भएको छ । न्यायिक निरुपणको लागि हामी सर्वोच्च जाँदैछौँ ।”

बिहीबार नै माओवादीसहितका ५२ जना प्रदेशसभा सदस्यको समर्थनमा प्रदेश प्रमुख कार्यालयमा सशरीर उपस्थित भई सनाखत गराए एमालेका कार्कीले नियुक्ति लिने तयारी गरेका छन् । बुधबार राति प्रदेश प्रमुख पर्शुराम खापुङले एमाले र माओवादी केन्द्रको दाबीअनुसार केदार कार्की नेतृत्वको सरकार अल्पमतमा परेको निष्कर्षसहित खापुङले सरकार गठनका लागि आह्वान गरेका थिए । 

नेकपा एमाले कोसी संसदीय दलका प्रमुख सचेतक  रेवतीरमण भण्डारीले दुबै दलका सांसद जम्मा भई प्रदेश प्रमुखको कार्यालयमा पुग्ने बताउँदै भने, “सरकार गठनको दाबीसहित हामी जाने तयारी छ ।” उनले बिहीबार नै कोसी प्रदेशमा मुख्यमन्त्री नियुक्त हुने बताए ।  

वैसाख ७ गते एमाले र माओवादीले संकल्प प्रस्ताव पारित गराई सरकारलाई दिएको समर्थन नरहेको र विश्वासको मत लिनुपर्ने जिकिर गरेका थिए । बहुमतको अभिलेखीकरण गराइ त्यसको जानकारी प्रदेश प्रमुख कार्यालयलाई समेत गराइएको थियो । प्रदेश प्रमुख खापुङले मुख्यन्यायाधिवक्तासँग परामर्श गरी बुधबार राति उपधारा ५ बमोजिम नै सरकार गठनका लागि आह्वान गरेका हुन ।