विराटनगर । कोसी प्रदेशका प्रमुख दुई दल नेकपा एमाले र माओवादी केन्द्रले नयाँ सरकार गठनको प्रक्रिया थाल्न माग गर्दै प्रदेश प्रमुखलाई लिखित आग्रह गरेका छन् । 

नेपालको संविधानको धारा १६८ को उपधारा ५ बमोजिम मुख्यमन्त्री नियुक्त भएका केदार कार्कीले विश्वासको मत गुमाएको भन्दै दुई दलले बुधबार प्रदेश प्रमुख पर्शुराम खापुङलाई पत्र दिँदै नयाँ सरकार गठनका लागि प्रक्रिया अघि बढाउन माग गरेका हुन् । असोज २७ गते एमालेका ३९ सांसद र कांग्रेसका आठ सांसदको समर्थनमा कार्की मुख्यमन्त्री नियुक्त भएका थिए । 

कोसी प्रदेश सरकारका मुख्यमन्त्री केदार कार्कीलाई एमाले र माओवादीले दिएको समर्थन फिर्ता भइसकेको र विश्वासको मत समेत नलिएकोले अब नयाँ प्रक्रियामा जान आग्रह गरिएको छ । 

“अल्पमतमा परेको थाहा पाउँदापाउँदै पनि संविधानको धारा १८८ (२) बमोजिम विश्वासको मत प्राप्त गर्ने प्रायोजनको लागि समयावधिभित्र प्रदेशसभाको अधिवेशन आह्वानका लागि कुनै प्रक्रियाअगाडि नबढाएको र राजीनामा पनि नदिएको हुँदा विक्रम संवत् २०८१ साल वैशाख २५ गते राति १२ बजेबाट माननीय केदार कार्कीले कोसी प्रदेश सरकाको मुख्यमन्त्री पदको संवैधानिक र कानुनी हैसियत गुमाई स्वतः पद मुक्त भइसक्नु भएको” भन्ने व्यहोरा पत्रमा छ । ती दलले नेपालको संविधानबमोजिम नयाँ सरकार गठनका लागि तत्काल उपयुक्त प्रक्रिया प्रारम्भ गर्न माग गरेका छन् । 

नेकपा एमाले कोसी प्रदेश संसदीय दलका नेता हिक्मतकुमार कार्की र नेकपा माओवादी केन्द्र संसदीय दलका नेता इन्द्रबहादुर आङ्बोले प्रदेश प्रमुख खापुङलाई पत्र दिएका हुन् । यही वैसाख ७ गते एमाले र माओवादीले प्रदेशसभाबाट संकल्प प्रस्ताव पारित गर्दै मुख्यमन्त्रीलाई राजीनामा दिन वा विश्वासको मत लिन आग्रह गरेका थिए । 

प्रदेशसभा सचिवालयले मुख्यमन्त्री कार्कीले विश्वासको मत प्राप्त गर्नेसम्बन्धी कुनै पत्र दर्ता नगराएको ती दललाई जानकारी गराएको थियो । प्रदेश प्रमुख खापुङले संविधान र नियम कानुनअनुसार नै आफू अघि बढ्ने बताएका छन् ।