विराटनगर । कोसीमा नयाँ राजनीतिक परिवेशको विषयमा आन्तरिक छलफल गरी विपक्षी दलका नेता प्रदेश प्रमुखको कार्यालय पुगेका छन् । नेकपा एमाले संसदीय दलका नेता हिक्मत कार्की र माओवादी केन्द्र संसदीय दलका नेता इन्द्र आङ्बो विराटनगरको बिग होटेलमा आन्तरिक छलफल सकेर प्रदेश प्रम्ुखको कार्यालय पुगेका हुन्  । संकल्प प्रस्ताव पारित गरेर मुख्यमन्त्री केदार कार्कीले राजीनामा गर्नुपर्ने वा विश्वास मत लिनुपर्ने पक्षमा रहेका यी दुई दल नयाँ प्रक्रियाबाट कोसीमा सरकार गठन हुनुपर्ने पक्षमा छन् । 

संकल्प प्रस्ताव पारित भएको ३० दिन पुग्दा समेत मुख्यमन्त्री कार्कीले विश्वासको मत नलिएकोले अब नयाँ प्रक्रिया थालनी हुनुपर्ने एमाले–माओवादीको जिकिर छ । “सम्भवतः नयाँ सरकार गठनका लागि आजै प्रदेश प्रमुखबाट आह्वान हुनसक्छ,” एमालेका एक सांसदले भने, “नेताहरू अहिले भने छलफलका लागि समय लिन प्रदेश प्रमुखकहाँ पुग्नु भएको हो ।” विपक्षी दलहरूले दिउँसो २ बजे प्रदेश प्रमुखसँग थप छलफल गर्ने बताइएको छ । 

मुख्यमन्त्री कार्कीले आफू नेपालको संविधानको धारा १६८ को उपधारा ५ बमोजिम नियुक्त भई विश्वसको मतसमेत प्राप्त गरेकाले दुई वर्षसम्म विश्वासको मत लिनुनपर्ने बताउँदै आएका छन् । 

गत चैत २६ गते नेकपा एमाले र नेकपा माओवादी केन्द्रका सांसदहरूले कार्की नेतृत्वको सरकारलाई दिएको समर्थन र विश्वासको मत फिर्ता लिएका थिए । संविधानको धारा १८८ को उपधारा २ अनुसार समर्थन फिर्ता भएको ३० दिनभित्र मुख्यमन्त्रीले विश्वासको मत लिनुपर्ने बाध्यता रहेको दुई दलको दाबी छ ।

प्रदेशसभाको अधिवेशनबाट वैशाख ७ गते संकल्प प्रस्ताव पारित भएको थियो । यसमा ५२ सांसदले पक्षमा मतदान गरेको विषय प्रदेशसभाले अभिलेखीकरण गरी मुख्यमन्त्री तथा मन्त्रिपरिषद् कार्यालय र प्रदेश प्रमुखको कार्याललाई पत्रमार्फत जानकारी गराएको थियो । 

केही दिनअघि मात्र प्रदेश प्रमुख पर्शुराम खापुङसमक्ष भेट गरी मुख्यमन्त्री कार्कीले संविधानअनुसार नै कदम चाल्न स्मरण गराएका थिए । कार्की गत असोजमा एमालेका ३९ र कांग्रेसका ८ सांसदको समर्थनमा मुख्यमन्त्री नियुक्त भएका थिए ।