काठमाडौं । रक्षामन्त्री हरिप्रसाद उप्रेतीले देशमा राष्ट्रियताको विषय कमजोर देखिएको बताएका छन् । मंगलवार राष्ट्रियसभाअन्तर्गतको संघीयता सबलीकरण तथा राष्ट्रिय सरोकार समितिको बैठकमा बोल्दै उनले देशमा राष्ट्रियताको विषय कमजोर देखिएको बताएका हुन् ।

मन्त्री उप्रेतीले विभिन्न व्यक्तिहरूले बैंकको किस्ता तिर्न नसक्दा र बच्चाहरूको शुल्क तिर्न नसक्दा समेत राष्ट्रियताप्रति प्रश्न उठाउने गरेको भन्दै राष्ट्रियतालाई सस्तो विषय नबनाउन आग्रह गरे । उनले आफ्नो मौलिकता, संस्कृति र परम्परामाथि समेत प्रहार गर्ने गरिएको भन्दै यसप्रति सबै सचेत हुनुपर्ने बताए । 

“राष्ट्रिय अस्मिताको रक्षा र राष्ट्रिय हितको संरक्षणका लागि राष्ट्रको सबै शक्ति र संरचना एकढिक्का भएर उभिन आवश्यक छ । अहिले हाम्रो राष्ट्रिय सुरक्षाको विषय, राष्ट्रियताको विषय कमजोर भएको देखिन्छ। यसको विभिन्न ठाउँमा भएका अभिव्यक्तिलाई हेर्दा बैंकको किस्ता तिर्न नसक्दा पनि राष्ट्रियताप्रति लल्कारेको देखिन्छ । बच्चाहरुको फि तिर्न नसक्दा पनि राष्ट्रियताप्रति लल्कारेको देखिन्छ । यदि फलानो देशले लिएको खण्डमा त हामीले सस्तोमा गाडी चढ्न पाइन्थ्यो भन्ने किसिमको समेत अभिव्यक्तिहरु आउन थालेको छ । कस्तो व्यवस्था गर्दाखेरी त्यस्तो अभिव्यक्तिहरु आउन छोड्छन् ? आफ्नो मौलिकता, संस्कृति, परम्परामाथि प्रहार गर्ने । आफूले मान्दै आएका चिजहरुलाई, आफ्नो इच्छाहरु पुरा नहुँदाखेरी लल्कार्ने । यी विषयहरूलाई कुन तरिकाले जाँदाखेरी राम्रो हुनसक्छ र आफ्नो मौलिकता रहन्छ ? भन्ने विषयमा समितिले पनि निर्देश गरोस्,” उनले भने ।

विगतमा जस्तो सीमामा तरबार लिएर बसेमात्रै राष्ट्रिय सुरक्षा नहुने भन्दै उनले अहिले वातावरण, भोकमरी लगायतका विषयहरूसँग पनि लड्दै राष्ट्रिय सुरक्षा कायम गर्नुपर्ने अवस्था रहेको बताए । उनले सुरक्षाको सवालमा ‘होल अफ द नेसन’को अवधारणाले मात्रै काम गर्ने बताए । 

“देशको सम्पदाहरुको महत्वलाई नबुझ्ने अनि राष्ट्रियतालाई लर्कार्ने । राष्ट्रिय सुरक्षाको विषय आज पहिलाको इतिहासमा जस्तो घोडामा तरबार लिएर घुमाएर बोर्डरमा हिँड्ने मात्रै होइन । आज वातावरणसँग, भोकमरीसँग सम्बन्धित सबै कुराहरूमा अगाडि बढ्नु अपरिहार्य जस्तो देखिएको छ । सुरक्षाको सवालमा होल अफ द नेशनको अवधारणाले मात्रै काम गर्दछ,” उनले भने ।