विराटनगर । कोसी प्रदेशका मुख्यमन्त्री केदार कार्कीले  प्रदेश प्रमुख पर्शुराम खापुङलाई संकल्प प्रस्ताव पारित गराएर सरकार फेरबदलको प्रयास हुन नसक्ने जानकारी गराएका छन् । 

संविधानको धारा १६८ को उपधारा ५ बमोजिम गठन भएको कार्की नेतृत्वको सरकार अल्पमतमा परेको भन्ने दाबीसहित नयाँ गठबन्धन दलले प्रदेशसभाबाट संकल्प प्रस्ताव पारित गराएका थिए । त्यो प्रक्रियाबाट सरकार गठन गर्न प्रदेश प्रमुख खापुङलाई सन्देशका नाममा निर्देशन दिन नसक्ने मुख्यमन्त्री कार्कीले मंगलबार लिखित जानकारी गराएका हुन् । 

संविधानको धारा १७३ ’घ’ मा भएको व्यवस्था अनुरुप मुख्यमन्त्रीले समसामयिक विषयमा प्रदेश प्रमुखलाई जानकारी गराउने व्यवस्था छ । कार्कीले भने, “सोही व्यवस्थाअनुसार, मैले बेलाबेलामा प्रदेश प्रमुखज्यूसँग छलफल गर्ने गरेको छु ।”