इलाम । वाम गठबन्धन गरेर चुनाव लड्ने चर्चाकै बीच इलाम– २ मा नेकपा एसले उमेदवार उठायो ।  नेकपा एसबाट प्रतिनिधिसभा सदस्य उमेदवार जितबहादुर राइ मैदानमा उत्रिए ।

नेकपा एसले पनि इलामकै पुराना नेतासमेत रहेका सम्मानीत नेता झलनाथ खनाललाई चुनावी कमाण्डर बनाएर पठायो । मनोनयनका बेला खनालले जितबहादुरलाई जिताइछाड्ने दाबी गरेका थिए ।  “नामै जितबहादुर काफी छ । परिणाम आएपछि सबै चकित खान्छन्,” झलनाथले दाबी गरेका थिए । 

हुन पनि नतिजा यस्तै आउने देखिन्छ । नेकपा एसले ३४ हजार मत गणना हुँदा तीन सय मत पनि कटाउन सकेको छैन । नेकपा एस स्रोतका अनुसार खनालको जोडबलमा पार्टीले उमेदवारी दिएको हो । उमेदवार आफै स्वयम् यहाँका मतदाता पनि होइनन् । 

११०१२ मत गणना हुँदा चुलाचुली गाउँपालिकामा नेकपा एसले २२३ मत पायो । वडा नम्बर १ मा ६७, वडा नम्बर २ मा ५६, वडा नम्बर ३ मा ९४ मत प्राप्त गरेको थियो । यस्तै वडा नम्बर ४ मा ४ तथा वडा नम्बर ५ र ६ मा समान एक–एक प्राप्त गरेको थियो ।

९५२४ मत गणना भएको फाकफोकथुम गाउँपालिकामा जम्मा १७ मत पाएको छ । वडा नम्बर २ बाट ६, वडा नम्बर ४ बाट ६ र वडा नम्बर ६ बाट ५ मत पाए । वडा नम्बर १,३,५,७ मा शुन्य मत एसले पाएको छ । 

७०७८ मत गणना भएको माङ्सेवुङबाट उमेदवार राईलाई २० मत आएको छ । यहाँ वडा नम्बर ३ मा १५, वडा नम्बर ३ मा ३, वडा नम्बर ५ बाट १ र वडा नम्बर १ मत पाएका छन् । माइ नगरपालिकाको ६ वडाबाट १, वडा नम्बर ७ वाट २५ तथा वडा नम्बर ८ बाट १ मत पाउँदा कुल मत २७ मत आएको छ । देउमाइ नगरपालिकाबाट उनलाई १ मत मात्र आएको छ ।