काठमाडौं । कोभेन्ट्री सिटीलाई पेनाल्टी सुटआउटमा ४–२ ले हराउँदै म्यानचेस्टर युनाइटेडले एफए कपको उपाधिका निम्ति म्यानचेस्टर सिटीसँगको भेट पक्का गरेको छ । आइतबार राति भएको खेलमा ३–० को अग्रता जोगाउन नसके पनि युनाइटेडले पेनाल्टीमा नतिजा आफ्नो पक्षमा पारेको हो । 

वेम्बली रंगशालामा निर्धारित र अतिरिक्त समयको खेल ३–३ को बराबरीमा सकिएको थियो । त्यसपछि नतिजाको निर्णय पेनाल्टी सुटआउटबाट गरिएको हो ।

पेनाल्टीमा युनाइटेडका डियागो डालोट, क्रिस्टियान एरिक्सन, ब्रुनो फर्नान्डेज र रास्मस होल्यान्डले गोल गरे । युनाइटेडबाट पहिलो प्रहारका निम्ति आएका कासिमिरोको प्रहार असफल भएको थियो ।

कोभेन्ट्रीका हाजी राइट र भिक्टर टोर्पले गोल गरे । क्यालम ओ’हर र बेन सएफको प्रहार सफल नहुँदा कोभेन्ट्रीले फाइनल पुग्ने अवसर गुमायो ।

त्यसअघि, ७० मिनेटसम्म युनाइटेडले ३–० को अग्रता बनाएको थियो । तर, त्यसलाई जोगाउन सकेन । स्कट म्याक टोमिनी, ह्यारी मग्वाएर र बु्रनो फर्नान्डेजले गोल गर्दा ७० मिनेटसम्म युनाइटेड ३–० ले अघि थियो ।

३० मिनेटमा तीन गोल गर्दै कोभेन्ट्री सिटी खेलमा फर्किएको थियो । कोभेन्ट्रीका लागि एलिस सिमन्स, क्यालम र हाजीले गोल गरेका हुन् ।

यसअघि, सिटीले शनिबार चेल्सीलाई १–० ले हराउँदै फाइनलमा स्थान बनाएको थियो । फाइनल खेल आउँदो मे २५ मा हुनेछ ।