काठमाडौं । अख्तियार दुरूपयोग अनुसन्धान आयोगले राष्ट्रिय सूचना प्रविधि केन्द्रका तत्कालीन कार्यकारी निर्देशक तथा नेपाल टेलिकमका निलम्बित प्रबन्ध निर्देशक सुनिल पौडेलविरुद्ध भ्रष्टाचार मुद्दा दायर गरेको छ । पौडेलले २३ करोड ७५ लाख ४६ हजार ३२४ रुपैयाँ गैरकानुनी सम्पत्ति आर्जन गरी भ्रष्टाचार गरेको ठहर गर्दै अख्तियारले आइतबार विशेष अदालत काठमाडौंमा मुद्दा दायर गरेको हो ।
पौडेलले पदीय मर्यादाविपरीतका कार्यहरू गरी गैरकानुनी सम्पत्ति आर्जन गरेको भन्ने उजुरी परेपछि अख्तियारले अनुसन्धान सुरू गरेको थियो । अनुसन्धान हुँदा पौडेल २०६१ जेठ २० गते राष्ट्रिय सूचना प्रविधि केन्द्र, सिंहदरबारमा प्रशासकीय अधिकृतको पदमा करार सेवामा नियुक्त भई २०६२ माघ २८ गतेसम्म कार्यरत रहेको पाइएको थियो ।
यस्तै, पौडेलले २०६५ असार १२ गते राष्ट्रिय सूचना प्रविधि केन्द्रमा सिहदरबारमा नै कम्प्युटर इन्जिनियर पदमा करारमा नियुक्त भई २०७५ साउन २० गतेसम्म केन्द्रको विभिन्न पदमा करारमा कार्यरत रहेका थिए ।
उनी २०७५ साउन २१ गते केन्द्रको कार्यकारी निर्देशक पदमा नियुक्त भई २०७८ चैत २४ गतेसम्म सोही पदमा कार्यरत रहेका थिए । २०७८ चैत २५ मा नेपाल दुरसञ्चार कम्पनी लिमिटेड (नेपाल टेलिकम) को प्रबन्ध निर्देशक पदमा पौडेल नियुक्त भएका थिए ।
उनी विभिन्न सरकारी पदमा रहेर काम गर्दाको आम्दानी, लगानी र प्राप्त ब्याजसमेत जोड्दा एक करोड १९ लाख २४ हजार ८४६ रुपैयाँ ४७ पैसा वैधानिक रूपमा आर्जन गरेको अख्तियारको अनुसन्धानले देखाएको छ ।
तर, सोही समयमा उनको कुल खर्च तथा लगानी २४ करोड ९४ लाख ७१ हजार १७१ रुपैयाँ ४ पैसा देखिएको अख्तियारद्वारा आइतबार जारी विज्ञप्तिमा उल्लेख छ । अनुसन्धानमा २३ करोड ७५ लाख ४६ हजार ३२४ रुपैयाँ ५७ पैसा बराबरको खर्च तथा लगानीको वैधानिक स्रोत नखुलेकोले उक्त रकम उनले भ्रष्टाचार गरी आर्जन गरेको ठहर अख्तियारले गरेको छ ।
अख्तियारले दायर गरेको मुद्दामा पौडेलसँग २३ करोड ७५ लाख ४६ हजार ३२४ रुपैयाँ ५७ पैसा बिगो दाबी गरिएको छ । अख्तियारले भ्रष्टाचार निवारण ऐन, २०५९ को दफा २० को उपदफा (२) बमोजिम बिगोअनुसार कैद र बिगोबमोजिम जरिबानाको सजाय पनि माग गरेको छ ।