काठमाडौं । हिरो मोटोकर्पको नेपालका लागि आधिकारिक वितरक एवम् व्यापारिक साझेदार सीजी मोटर्स बनेको छ । हिरो र सीजीले आइतबार काठमाडौंमा एक कार्यक्रमको आयोजना गर्दै औपचारिकरूपमा साझेदारी घोषणा गरेका हुन् ।

हिरो मोटोकर्पले नेपालमा एसेम्बली प्लान्टको उद्घाटन गर्दै सीजीसँगको साझेदारीमा बजार विस्तारको योजनासमेत अघि सारेको छ ।

मोटरसाइकल तथा स्कुटर उत्पादन गर्ने विश्वकै सबैभन्दा ठूलो कम्पनी हिरो मोटोकर्पले सीजीसँगको सहकार्यले नेपालमा आफ्नो प्रतिबद्धता अझै बलियो बन्ने बताएको छ ।

चार वटाबाट बिक्री सुरु

हिरो मोटोकर्पले नेपालमा सीजीमार्फत एक्सपल्स २०० ४भी, सुपर स्पिलेन्डर, स्पिलेन्डर प्लस गरी तीन माेटरसाइकल र जुम ११० स्कुटरको बिक्री थालेको छ । 

यी चारवटै उत्पादनलाई कम्पनीले नवलपरासीको सीजी इन्डस्ट्रियल पार्कमा अवस्थित अत्याधुनिक एसेम्बली फ्यसिलिटीमा स्थानीयरूपमै एसेम्बल गर्ने भएको छ ।

प्लान्टको क्षमता प्रतिवर्ष ७५ हजार युनिट हुने र यसले नवलपरासी क्षेत्रमा नयाँ लगानी ल्याउन र रोजगारीका अवसरहरू सिर्जना गर्ने कम्पनीले जनाएको छ ।

सीजी मोटर्सले बढ्दो ग्राहक संख्यालाई ध्यानमा राख्दै नेपालभर सेल्स तथा सर्भिस सेन्टरको नेटवर्क द्रूतरूपमा विस्तार गर्ने बताएको छ ।

आगामी तीन महिनाभित्र १०० भन्दा बढी सेल्स तथा सर्भिस आउटलेटहरू खोल्ने  कम्पनीको लक्ष्य छ ।

सीजी मोटर्सले काठमाडौंमा हिरोको प्रमुख तथा फ्ल्यागसिप सोरुम खोलिसकेको बताएको छ ।

सहकार्यबारे हिरो मोटोकर्पको ग्लोबल बिजनेस युनिटका चिफ बिजनेस अफिसर सञ्जय भानले नवीनता र प्रविधिलाई मूल मन्त्र मानेर विश्वभरका ग्राहकलाई विश्वस्तरीय उत्पादनहरू प्रदान गर्न प्रतिबद्ध रहेको बताए । नयाँ सहकार्यले हिरो मोटोकर्प, सीजी मोटर्स र नेपालका लागि उत्साहजनक क्षण भएको उनको भनाइ छ । अत्याधुनिक एसेम्बली युनिटले अब विश्वस्तरीय उत्पादन नेपालमै बनाइने र देशभरका ग्राहकहरूका लागि सजिलै उपलब्ध हुने उनले बताए ।

“सेल्स र सर्भिस नेटवर्कको द्रूत विस्तारले हामीलाई हाम्रा विश्वस्तरीय उत्पादनहरू र सेवाहरूसँग बजार जोड्न सक्षम बनाउँछ । हाम्रो साझेदार सीजी मोटर्ससँगै नेपालमा हाम्रो नयाँ फोकसले नेपालप्रतिको हाम्रो प्रतिबद्धतालाई प्रतिबिम्वित गर्दछ, जुन हाम्रो लागि निकै महत्त्वपूर्ण बजार हो ।"

उनले यसअघि हिरो एक नम्बर रहेको र अहिले खसकिए पनि निर्वाण चौधरीको नेतृत्वमा फेरि एक नम्बरमा जाने बताए । उनले एक वर्षभित्र विद्युतीय सवारी बजारमा ल्याउने पनि बताए ।

त्यस्तै, चौधरी ग्रुपका प्रबन्ध निर्देशक निर्वाण चौधरीले सीजी मोटर्सका लागि हिरो मोटोकर्पसँगको सहकाेय विशेष क्षण भएको बताए ।

"सीजी मोटर्सका लागि यो एकदमै विशेष क्षण हो । हामी हाम्रो एसेम्बली सुविधाको उद्घाटन गर्न र यी नयाँ उत्पादनहरू लन्च गर्न पाउँदा उत्साहित छौँ । हिरो मोटोकर्पको उत्पादन तथा व्यापार प्रक्रियाका विश्व स्तरीय दक्षता हाम्रो सञ्चालन विस्तार गर्नका लागि हामीलाई धेरै लाभदायक हुनेछ । अब हामी देशभर एक बलियो बजार उपस्थिति निर्माण गर्न तत्पर हुनेछौँ,” उनले भने ।

उनले देशबाट युवाहरू बाहिरिरहेका बेला कम्पनीले आशा देखेको बताए । उनले हरेक मानिसभित्र एक हिरो हुने बताउँदै हिरोले नेपाली बजारमा अझै नयाँ उचाइ बनाउने बताए ।

चौधरीले हिरो मोटोरसाइकलको प्रविधि, मूल्य र बिक्रीपछिको सेवमा कुनै शंका गर्न नमिल्ने पनि बताए ।

"नयाँ एसेम्बली सुविधा नेपालको मध्यभागमा अवस्थित छ, जसले गर्दा उत्पादनहरू द्रूतरूपमा देशभर उपलब्ध हुने सुनिश्चितता प्रदान गर्नेछ । साथै, सेल्स तथा सर्भिस नेटवर्कको द्रूत विस्तारले सबै ग्राहक आवश्यकताहरू निर्वाधरूपमा सम्बोधन गरिएको सुनिश्चित गर्नेछ," उनले भने ।

सन् २०१४ मा नेपालमा प्रवेश गरेको हिरोले बर्सौंदेखि सुपर स्प्लेन्डर र एक्सपल्स २०० मोटरसाइकलहरूजस्ता सर्वाधिक रुचाइएका प्रतिष्ठित उत्पादनका साथ आफूलाई देशकै अग्रणी मोटरसाइकल ब्रान्डको रूपमा स्थापित गरेको छ ।

कम्पनीका लागि एसियामा नेपाल एक प्रमुख बजार हो । चौधरी ग्रुप (सीजी) नेपालको व्यापार परिदृश्यमा एक प्रमुख व्यावसायिक घराना हो ।