काठमाडौं । नेपाल प्रहरीले समाजमा नकारात्मक असर पार्ने सामग्रीको प्रकाशन तथा प्रसारण नगर्न आमसञ्चारमाध्यामलाई आग्रह गरेको छ ।

प्रहरीको अपराध अनुसन्धान विभागले आइतबार काठमाडौंमा अन्तरक्रिया कार्यक्रम गरी समाजमा नकारात्मक असर पार्ने बीभत्स दृश्य ‘भ्युज’ बढाउने नाममा सामाजिक सञ्जालमा प्रत्यक्ष प्रसारण नगर्न पनि सचेत गराएको छ ।

विभागका प्रमुख एवं प्रहरी अतिरिक्त महानिरीक्षक टेकबहादुर तामाङले न्यूनतम मानवीय संवेदनशीलतालाई ख्याल राखेर बीभत्स दृश्यलगायत समाजमा नकारात्मक असर पार्ने सामग्री जथाभावी प्रकाशन तथा प्रसारण नगर्न सचेत गराए । उनले पक्राउ पर्नेबित्तिकै अपराधी भनेर करार गर्ने काम नगर्न पनि सञ्चारमाध्यमको ध्यानाकर्षण गराए ।

प्रहरी अतिरिक्त महानिरीक्षक तामाङले समाजमा नकारात्मक भावनाको विकास गराउने सामाजिक सञ्जाल प्रयोगकर्तालाई कडा निगरानीमा राखी कारबाही गर्ने कार्यलाई उच्च प्राथमिकतामा राखिएको बताए ।

समाजमा नकारात्मक असर पु¥याउने खालका समाचार प्रकाशन/प्रसारण गर्न उपयुक्त नहुने उनको भनाइ थियो । न्युज एजेन्सी नेपाल