काठमाडौं । नेकपा (एमाले)का अध्यक्ष केपी शर्मा ओलीले राजनीतिक पार्टीहरूबीच सिद्धान्त, विचार र नीतिका आधारमा स्वस्थ प्रतिस्पर्धा हुनुपर्नेमा जोड दिएका छन् । यसप्रकारको प्रतिस्पर्धाले लोकतन्त्रलाई बलियो बनाउने उनले उल्लेख गरेका छन् ।
ललितपुरको गोदावरीमा शनिबारदेखि सुरु पार्टीको प्रथम राष्ट्रिय महाधिवेशन प्रतिनिधि परिषद्को बैठकमा प्रस्तुत राजनीतिक प्रतिवेदनमा उनले लेखेका छन्, “...दलहरूबीच संगठनको बलमा र राम्रा काममा स्वस्थ प्रतिस्पर्धा हुने कुराले समाजमा लोकतान्त्रिक संस्कृतिलाई प्रवर्द्धन गर्छ ।”
अचानक सत्ताबाट बाहिरिनु पर्दा यति बेला नेपाली कांग्रेस आक्रोशित, क्षुब्ध र हतास देखिएको उनको ठहर छ । “...यही हतासाले उसलाई प्रतिशोधको राजनीतिमा पुर्याएको छ,” उनले लेखेका छन्, “फागुन २१ गतेबाट सुरु भएको नयाँ समीकरणलाई सफल हुन नदिन र भत्काउन उसले (कांग्रेस) हरसम्भव प्रयास गर्यो । त्यसका लागि उसले रास्वपा र अन्य कतिपय दलका नेताहरूलाई प्रधानमन्त्री पदको समेत प्रस्ताव गर्यो ।”
हतास मनस्थितिका साथ कांग्रेसले विरोध र सदनमा अवरोध गरिरहेको उनको आरोप छ । यसका पछाडि प्रतिशोधबाहेक कुनै तर्कसंगत आधार नभएको ओलीको जिकिर छ ।
सहकारी क्षेत्रमा गम्भीर समस्या देखिएको भन्दै उनले बचतकर्ताको अर्बौँ रुपैंयाँ रकम हिनामिना भएको उल्लेख गरेका छन् । यसको गम्भीर छानबिन र दोषीलाई कानुनी कारबाही गरिनुपर्नेमा एमाले स्पष्ट रहेको उनले जनाएका छन् ।
“तर, निश्चित व्यक्तिलाई निसाना बनाएर राजनीतिक प्रतिशोधको भावनाले अगाडि सारिएका र पुष्टि नभएका विषयमा प्रवेश गर्न सकिँदैन,” उनले लेखेका छन् ।
प्रतिवेदनको पूर्णपाठ पढ्नोस्–
