काठमाडौं । होन्डाको होन्डा टेक्निसियन स्किल कन्टेस्ट २०२४ सम्पन्न भएको छ । कम्पनीले आफ्नो डिलर नेटवर्कमा कार्यरत टेक्निसियनहरूको सीप तथा दक्षता अभिवृद्धि गर्ने र बिक्री पछिको सर्भिसको सेवा उत्कृष्ट बनाउने उद्देश्यले यो कन्टेस्ट आयोजना गरेको बताएको छ । 

कम्पनीका अनुसार कन्टेस्टमा एस.टी.सी वर्कशप टेकुका प्रलाद दाहालले प्रथम स्थानसहित पुरस्कार प्राप्त गरेका छन् । 
यस्तै, ओम सत्य साही अटो सिटी इटहरीका गजेन्द्र बुढाथोकी द्वितीय र एस.टी.सी वर्कशप कोहलपुरका सन्तोष अर्जेलले तृतीय पुरस्कार प्राप्त गरेको कम्पनीले जनाएको छ ।

प्रथम हुनेले ५० हजार, द्वितीयले ३० हजार र तृतीयले २० हजार नगद पुरस्कारकासाथै सबै सहभागीहरूलाई प्रमाणपत्र वितरण गरिएको कम्पनीले बताएको छ ।  नेपाल अटो मेकानिक्स ट्रेड युनियनका केन्द्रीय अध्यक्ष प्रदीप घिमिरे तथा स्याकार ट्रेडिङका विभिन्न डिभिजन प्रमुखहरूको उपस्थितिमा चैत २८ गते होन्डाको ट्रेनिङ सेन्टर ग्वार्को ललितपुरमा कार्यक्रम सम्पन्न भएको हो ।

कम्पनीका अनुसार प्रतियोगिता अवधिभर होन्डा जापानले उपलब्ध गराएको मार्गनिर्देशन अनुसार टेक्निसियनहरू होन्डा स्टयान्डर्ड प्रोसिडुअरअन्तर्गत रहेर प्रतियोगितामा सहभागी भएका थिए ।

नेपालका लागि होन्डाको आधिकारिक वितरक स्याकार ट्रेडिङ कम्पनीअन्तर्गत सर्भिस डिभिजनले विभिन्न पाँच वटा क्षेत्रीय प्रतियोगिता सम्पन्न गरी प्रत्येक क्षेत्र बाट दुई÷दुईजना छनोट गरी राष्ट्रिय  स्तरको प्रतियोगिता सञ्चालन गरेको हो ।