काठमाडौं । सुदूरपरिश्चम प्रदेशको मुख्यमन्त्रीमा नागरिक उन्मुक्ति पार्टी (नाउपा)कै कैलाश चौधरीले पनि दाबी प्रस्तुत गरेका छन् । उनले नेकपा (माओवादी केन्द्र) र नेकपा (एमाले)को समर्थनमा दाबी पेस गरेका हुन् ।

यसअघि नेपाली कांग्रेस, नेकपा (एकीकृत समाजवादी)सहितको समर्थनमा नाउपाकै लक्ष्मणकिशोर चौधरीले दाबी प्रस्तुत गरेका छन् । रेशम चौधरीको पक्षमा रहेका सांसद लक्ष्मणकिशोरले ३० सांसदको हस्ताक्षर बुझाएका छन् ।

नागरिक उन्मुक्तिका ६, नेकपा (माओवादी केन्द्र)का ११ र नेकपा (एमाले)का १० सांसद छन् ।

नागरिक उन्मुक्तिले एक सांसदलाई बर्खास्त गरेको र कांग्रेसका एक सांसदको मृत्यु भएपछि पद रिक्त रहेकाले सुदूरपश्चिम प्रदेशभामा तत्काल कायम रहेको संख्या ५१ छ । जसको बुहमतका लागि २६ सदस्य आवश्यक पर्छ । नागरिक उन्मुक्तिका सांसदले एकमुस्ट कैलाशलाई समर्थन गरेमा उनका लागि आवश्यक बहुमत पुग्न सक्छ । 

तर, नागरिक उन्मुक्तिकै अर्का सांसद लक्ष्मणकिशोरको दाबी परेकाले नागरिक उन्मुक्तिका सांसदहरू एक ठाउँ उभिने अवस्था छैन । यस्तो अवस्थामा बहुमतका लागि प्रदेश प्रमुखले सनाखतका लागि बोलाउन सक्छन् । नागरिक उन्मुक्तिका सांसदहरू एकमुस्ट उपस्थित नभए सरकार गठनको प्रक्रिया अन्योलमा पर्नेछ ।

उता लक्ष्मणकिशोरका पक्षमा भने कांग्रेसका १८, नेकपा (एकीकृत समाजवादी)का चार र राप्रपाका एक सांसदको हस्ताक्षर छ । त्यसमा नाउपाकाका तीन सांसद अडिग रहे पनि बहुमत पुग्छ ।

तर, सरकार बनाउन सहज भए पनि दलीय ह्विपका कारण उनको सरकार पनि सुरक्षित नहुन सक्छ ।