![एमाले बागलुङको अध्यक्षमा केसी](https://12khari.top/uploads/posts/cpn-uml-1699078298.jpg)
बागलुङ । नेपाल कम्युनिस्ट पार्टी (एमाले) बागलुङको अध्यक्षमा हीराबहादुर केसी सर्वसम्मत निर्वाचित भएका छन् । बागलुङ बजारमा भएको १०औँ जिल्ला अधिवेशनबाट केसी दोस्रो कार्यकालका निम्ति सर्वसम्मत चयन भएका हुन् ।
निर्वाचन संयोजक डा. डिल्लीराज गौतमका अनुसार, एमाले गण्डकी प्रदेश कमिटीका पूर्वसदस्य हरिनारायण गौतमले उमेदवारी फिर्ता लिएपछि केसी सर्वसम्मत अध्यक्ष बनेका छन् । साथै, उपाध्यक्षमा विष्णु भुसाल सर्वसम्मत भएका छन् । यसअघि सचिव रहेका भुसाल नवौँ जिल्ला अधिवेशनमा समेत सर्वसम्मत भएका थिए ।
सचिवमा भने तीनजनाको उमेदवारी परेको छ । एमाले जिल्ला सचिवमा गणेश थापा, कुमार खड्का र चन्द्रप्रकाश शर्माको उमेदवारी परेको निर्वाचन कमिटीले जनाएको छ ।
सचिवमा सर्वसम्मतको प्रयास भइरहेको छ । उपसचिवमा पनि सर्वसम्मत रूपमा धनबहादुर परियार र करमती पुन चयन भएका छन् ।
“निर्वाचनको कार्यतालिकामै छौँ । एकल उमेदवारी कायम भएपछि अध्यक्ष, उपाध्यक्ष र उपसचिवमा सर्वसम्मत भइसकेको छ,” संयोजक गौतमले भने, “सचिवको विषयमा पार्टीले छलफल गरिरहेको होला, निर्वाचन कार्यतालिकाअनुसार हामी अगाडि बढिरहेका छौँ । एकल उमेदवारी पर्नु भनेको निर्वाचन जित्नु हो, निर्वाचन कार्यतालिकाअनुसार सबैको नतिजा आएपछि मात्रै घोषणा हुन्छ ।” रासस