काठमाडौं । राष्ट्रिय स्वतन्त्र पार्टी (रास्वपा)का सांसद मनिष झाले नेपाली कांग्रेस सरकारमा गएपछि भ्रष्टाचारमाथि बहस नभएको आरोप लगाएका छन् । बुधबारको प्रतिनिधिसभा बैठकमा बोल्दै उनले आफूहरू सुरूमा सरकारमा जाँदा भ्रष्टाचारको विषयमा साझा न्यूनतम लेखिएको विषय कांग्रेस सरकार गएपछि हटाइएको दाबी गरे ।
“कांग्रेस सरकारमा गएपछि भ्रष्टाचारको बहस नगरौँ भनियो,” उनले भने । सांसद झाले प्रायोजित पत्रकारलाई समाचार लेखाएर त्यसैको आधारमा आफ्नो पार्टीको सभापति रवि लामिछानेमाथि कांग्रेसले प्रहार गरिरहेको धारणा राखे ।
दर्ता नै नभएको उजुरीमा कसरी सभापति लामिछाने दोषी भए भन्ने प्रश्न पनि गरे । “कानुनले निर्णय दिएको छैन, सुरक्षा निकायले सूचना दियो । प्रधानमन्त्रीले अभिव्यत्ति दिनुभयो । चौकीमा कसैले दिएको उजुरी हो दर्ता भएको छैन । प्रायोजित पत्रकारलाई लेख्न लगाएको मात्र हो । त्यसको आधारमा प्रहार गरिएको छ,” उनले भने, “आउनुहोस् कानुन र प्रक्रियामा जाऔँ कति कुण्ठा पालेर बस्नुहुन्छ ?”
आफ्नो पार्टीका उदय नै सुशासनको लागि भएको भन्दै उनले शंका नगर्न र कुण्ठा नपाल्न बरु मिलेर काम गर्न अनुरोध गरे । उनले पार्टीले २०४७ पछिका भ्रष्टाचार काण्ड छानबिन गर्न कांग्रेसले जरुरी सार्वजनिक महत्त्वको प्रस्ताव दर्ता गराएको आफूहरूले थाहा पाएको र आफूहरू पनि यही लाइनमा सदनमा बोलिरहेको भन्दै सहकार्य गर्न आह्वान गरे ।
“हाम्रो कुरामा एकजना महामन्त्रीले तीन बजेर अर्कोले आठ बजे स्वागत गर्नुभएको रहेछ । आउनुहोस् ४७ साल पछिको सबै फाइल खोलौँ । हामी एक ठाउँमा उभियौँ । ४७ सालपछि सबैको फाइल खोलौँ । व्यक्तिगत कुण्ठाको रूपमा नलिउँ,” उनले भने ।
उनले सदनमा बोल्न पाउनुपर्ने भन्दै पटक–पटक निराधार विषयमा कुनै व्यक्तिमाथि लाञ्छना लगाउने काम अन्त्य हुनुपर्ने धारणा राखे ।
