काठमाडौं । उपप्रधान एवं भौतिक पूर्वाधार तथा यातायातमन्त्री रघुवीर महासेठले चालु आर्थिक वर्षको अन्त्यमा काठमाडौं उपत्यकामा आधुनिक ट्राफिक लाइटको व्यवस्था गर्ने तयारी गरिएको बताएका छन् । मंगलबार ललितपुरमा साझा यातायातको चार्जिङ स्टेसनको उद्घाटन कार्यक्रममा उनले यस्तो बताएका हुन् ।

बजेट व्यवस्थापन गरी पहिलोपटक काठमाडौं उपत्यकामा आधुनिक ट्राफिक लाइटको व्यवस्था गर्न लागिएको उनले जानकारी गराए । पहिलो चरणमा काठमाडौं, ललितपुर र भक्तपुर र त्यसपछि पोखरा, नेपालगन्ज, विराटनगर, जनकपुर र वीरगन्जमा आधुनिक ट्राफिक लाइट जडान गरिने उनले बताए । आवश्यकताअनुसार सरकारले यातायात क्षेत्रमा सुधार गर्दै जाने उनले उल्लेख गरे ।

उनले विद्युतीय ट्याक्सी र बसहरूलाई सरकारले दिन सक्ने सहुलियतका विषयमा छलफल भइरहेको बताए । ट्याक्सी र बसका निम्ति महँगो भइरहेको डिजेल र पेट्रोललाई विस्तारै विस्थापित गरेर विद्युतीय सवारीसाधन सञ्चालनका  विषयमा ‘होमवर्क’ गर्ने उनले प्रतिबद्धता जनाए । न्युज एजेन्सी नेपाल