काठमाडौं । लोकतान्त्रिक समाजवादी पार्टी (लोसपा)का अध्यक्ष महन्थ ठाकुरले मधेसमाथिको अन्याय मुलुकमा अझै जारी रहेको आरोप लगाएका छन् ।

शनिबार महोत्तरीको मटिहानीमा आयोजित एक कार्यक्रममा उनले सरकारले मधेसमाथि विभेद जारी राखेको जिकिर गरे । अदालतले पनि न्याय नगरेको उनले गुनासो गरे ।

उनले सबैभन्दा बढी जनसंख्या रहेको मधेस प्रदेशमा कम बजेट दिनु, निर्वाचन क्षेत्र कम बनाउनु मधेसमाथिको विभेदको उदाहरण रहेको बताए । मधेसमा देशको लगभग ५१ प्रतिशत जनसंख्या रहेको उनले उल्लेख गरे ।

समग्र मधेसवासीको हितका निम्ति अझै संघर्ष आवश्यक रहेकामा उनले जोड दिए । आफूहरूले शान्तिपूर्ण संघर्ष गर्दा पनि गोलीलाठी खानुपरेको पीडा उनले सुनाए ।

“आधाभन्दा बढी जनसंख्या भए पनि १६५ मध्ये सुरुमा ६५ सिट मात्रै दिइएको थियो । तर, हामीहरूकै आन्दोलनका कारण अहिले त्यो संख्या ७९ पुगेको छ, जबकि हाम्रो माग ८२ सिट रहेको छ,” उनले भने ।

संविधान संशोधन र आन्दोलनकारीको न्यायका निम्ति अझै संघर्ष गर्न आवश्यक रहेको उनको भनाइ थियो । न्युज एजेन्सी नेपाल