काठमाडौं । ‘एसएमएस फ्रेन्डसिप कप’ त्रिकोणात्मक ट्वान्टी–२० क्रिकेट प्रतियोगिताअन्तर्गत लिग चरणको अन्तिम खेलमा नेपाली क्रिकेट टिम बरोडा क्रिकेट एसोसियसनसँग ३७ रनले पराजित भएको छ । 

शुक्रबार भारतको वापीमा सम्पन्न खेलमा बरोडाले प्रस्तुत गरेको १५७ रनको लक्ष्य पछ्याउने क्रममा नेपाल १८.५ ओभरमा ११९ रनमै समेटियो । नेपालका सन्दीप जोराले ४३ बलमा चार चौका र तीन छक्कासहित सर्वाधिक ५६ रन बनाए पनि टिमको हार टार्न सकेनन् । विवेक यादवले १७ र कुशल भुर्तेलले १६ रन बनाए । 

बरोडाका ध्रुव पटेल र लक्षित तोक्सियाले समान तीन विकेट लिए । त्यसअघि टस जितेर ब्याटिङमा आएको बरोडाले निर्धारित २० ओभरमा आठ विकेट गुमाएर १५६ रनको योगफल तयार पारेको थियो । 

बरोडाका शाश्वत रावतले ३१ रन बनाए । ध्रुव पटेलले २९, अमित पासीले २६ मोहित मोंगियाले २२ र अभिमन्यु सिंह राजपुतले ११ रन थपे । 

नेपालका करण केसी र गुलसन झाले समान दुई विकेट लिए । आकाश चन्द, प्रतीश जीसी, ललितनारायण राजवंशी र कप्तान दीपेन्द्रसिंह ऐरीले समान एक विकेट लिए । 

हारका बावजुद पनि अघिल्ला तीनै खेलमा जित निकालेको नेपालले फाइनलमा स्थान बनाइसकेको छ । अघिल्ला तीनै खेलमा हार बेहोर्दै फाइनल दौडबाट बाहिरिएको बरोडा भने जितसहित प्रतियोगिताको अन्त्य गरेको छ । नेपालले उपाधिका लागि आइतबार गुजरात क्रिकेट संघको सामना गर्नेछ ।