काठमाडौं । इन्डियन प्रिमियर लिग (आईपीएल)मा पञ्जाव किंग्सले घरेलु टोली गुजरात टाइटन्सविरुद्ध तीन विकेटको रोमाञ्चक जित दर्ता गरेको छ । बिहीबार अहमदाबादस्थित नरेन्द्र मोदी क्रिकेट रंगशालामा गुजरातले प्रस्तुत गरेको २०० रनको लक्ष्य पञ्जाबले एक बल बाँकी छँदा सात विकेट गुमाउँदै पूरा गर्यो ।
पञ्जाबलाई जितका निम्ति अन्तिम ओभरमा सात रन आवश्यक थियो । ओभरको पहिलो बलमा विकेट गुमाएर दबाबमा आएको पञ्जाबले दोस्रो बल वाइड हुँदा एक अतिरिक्त रन पाएको थियो । तेस्रो बल डट भए पनि चौथो बलमा एक रन लिएपछि पञ्जाबलाई तीन बलमा पाँच रन आवश्यक थियो । ओभरको चौथो बलमा शशांक सिंहले चौका र पाँचौँ बलमा एक रन लिएपछि पञ्जाबले अन्तिम बलअगावै जित निश्चित गरेको हो ।
पञ्जाबको जितमा शशांकले २९ बलमा ६ चौका र चार छक्कासहित अविजित ६१ रन बनाए । प्रभसिम्रन सिंहले ३५, आशुतोष शर्माले ३१, जोनी बेरेस्टोले २२, जितेश शर्माले १६ र सिकन्दर राजाले १५ रन जोडे ।
गुजरातका नुर अहमदले दुई विकेट लिए । अजमतुल्लाह ओमारजाई, उमेश यादव, राशिद खान, मोहित शर्मा र दर्शन नलकण्डेले समान एक विकेट लिए ।
त्यसअघि, टस हारेर पहिले ब्याटिङको निम्तो पाएको गुजरातले निर्धारित २० ओभरमा चार विकेट गुमाएर १९९ रन बनाएको थियो । गुजरातका कप्तान शुभमन गिलले ४८ बलमा ६ चौका र चार छक्कासहित अविजित ८९ रनको योगदान गरे । साई सुदर्शनले ३३, केन विलियमसनले २६, राहुल तेवातियाले अविजित २३ र ऋद्धिमान शाहले ११ रन जोडे ।
पञ्जाबका कगिसो रबाडाले दुई विकेट लिए । हरप्रित ब्रार र हर्षल पटेलले समान एक विकेट हात पारे ।
जितसँगै चार खेलबाट चार अंक जोडेको पञ्जाब पाँचौँ स्थानमा उक्लिएको छ । समान खेलबाट समान अंक भए पनि गुजरात नेट रनरेटका आधारमा छैटौँ स्थानमा छ ।
