काठमाडौं । आसन्न उपनिर्वाचनअन्तर्गत इलाम क्षेत्र नम्बर–२ मा नेकपा (माओवादी केन्द्र)ले नेकपा (एमाले)लाई सघाउने भएको छ । माओवादीले इलाम–२ मा उमेदवार नउठाउने भएको उपमहासचिव तथा पार्टीका कोसी प्रदेश इन्चार्ज हरिबोल गजुरेलले जानकारी दिए ।

त्यसबारे आफूले ‘सर्कुलर’ जारी गरिसकेको उनले बताए । “इलाममा एमाले उमेदवारलाई सघाउने निर्णय भइसकेको छ । त्यसानुसार निर्णयबारे मैले जानकारी गराइसकेको छु,” उनले बाह्रखरीसित भने, “बझाङको सहकार्यबारे भने जानकारी छैन ।”

केन्द्रमा पदाधिकारी बैठकबाट आफ्नै उमेदवार उठाउने निर्णय गरिएको थियो । इलाम–२ मा धीरेन्द्र शर्मालाई उमेदवार बनाउन तल्ला कमिटीबाट सिफारिस समेत गरिएको थियो । तर, माओवादी ‘ब्याक’ भएको हो ।

माओवादी कोषाध्यक्ष श्रीराम ढकालले बझाङ क्षेत्र नम्बर १ ‘क’ मा भने पार्टीका उमेदवारलाई सघाउन एमालेसँग छलफल भइरहेको जानकारी दिए । त्यहाँ माओवादीले जनबहादुर बुढालाई उमेदवार बनाउने तयारी गरेको छ ।

एमालेले इलाम–२ मा सुहाङ नेम्वाङ र बझाङमा दमनबहादुर बुढालाई उमेदवार बनाउने निर्णय गरिसकेको छ । एमालेका प्रचार विभाग प्रमुख राजेन्द्र गौतमले बझाङ छाड्ने गरी सहमति नभएको बताए । “हामीले कहीँ छाड्ने गरी निर्णय गरेका छैनौँ । छलफल हुँदै छ,” गौतमले भने ।