विराटनगर । विराटनगरमा जारी आठौँ संस्करणको विराट गोल्डकप फुटबल प्रतियोगिताको सेमिफाइनल समीकरण पूरा भएको छ । मंगलबार अन्तिम क्वाटरफाइनलका खेल सम्पन्न भएसँगै प्रतियोगिताको सेमिफाइनल समीकरण पूरा भएको हो ।

विराटनगरको सहिद मैदानमा मंगलबार सम्पन्न अन्तिम क्वाटरफाइनल खेलमा मच्छिन्द्र एफसी काठमाडौंले कोलकाताको साउर्थन समिति एफसिलाई २–१ गोलले पराजित गर्दै सेमिफाइनलमा प्रवेश गरेको छ ।

जितका लागि मच्छिन्द्रका विदेशी खेलाडी स्टेफन विनोङ नायक भए । टिमलाई सेमिफाइनलमा पुर्‍याउन दुवै गोल स्टेफनले गरे । खेलको प्लेयर अफ द म्याच पनि स्टेफन घोषित भए । उनले नगद ११ हजार पाए । कोलकाताको तर्फबाट सान्तवना गोल सोनु हल्दारले फर्काए ।

सेमिफाइनल प्रवेश गरेको मच्छिन्द्रले अब फाइनल प्रवेशका लागि बिहीबार सिक्किम ड्रागन भारतसँग सामना गर्दै छ । यसअघि घरेलु टिम सांग्रिला मोरङ एफए र विभाग्य टिम सशस्त्र प्रहरी बल (एपीएफ) सेमिफाइनलमा पुगिसकेका छन् । एपीएफले इटहरी गोल्डकप च्याम्पियन चर्च ब्वाइज युनाइटेड काठमाडौंलाई २–० गोलले हराउँदै सेमिफाइनलमा पुगेको थियो । घरेलु टिम सांग्रीलाले भुटानको आरटिसिएफसी ३–२ गोलले हराउँदै सेमिफाइनलको स्थान पक्का गरेको थियो । 

प्रतियोगिताअन्तर्गत पहिलो सेमिफाइनल खेलमा बिहीबार सांग्रिला र विभाग्य टिम एपीएफबीच प्रतिस्पर्धा हुनेछ । 

अन्तिम क्वाटरफाइनलमा मच्छिन्द्रका विदेशी स्टेफन विनोङले खेल सुरु भएको १०औँ मिनेटमा गोल गरी टिमलाई अग्रता दिलाए । मनिष डाँगीले निकालेको क्रस पासलाई स्टेफनले मध्य भागबाट वललाई एक्लै लगेर कोलकताका गोलकिपर सुरजक मल्किलाई बिट गर्दै उत्कृष्ट फिनिसिङ गरे ।

मच्छिन्द्रले अग्रता लिएको २२ मिनेट बित्न नपाउँदै कोलकताका सोनु हल्दारले ३२औँ मिनेटमा गोल गरी खेल बराबरीमा ल्याए । सत्रिय बक्सीले निकालेको पासलाई सोनुले गोल गरेका थिए ।

पहिलो हाफ १–१ गोलको बराबारीमा सकियो । दोस्रो हाफदेखि मच्छिन्द्रले आक्रमक खेल पस्कियो । खेलको ५५औँ मिनेटमा स्टेफन विनोङल गोल गर्दै मछिन्द्रलाई २–० को जित दिलाए । सनिश श्रेष्ठले निकालेको पासलाई स्टेफनले टच गर्दा आकर्षक गोल भयो । 

४१औँ मिनेटमा सत्रिय बक्सीले दायाँ बार च्यापेर प्रहार गोलेको बललाई मछिन्द्रका गोलपिकर विशाल श्रेष्ठले पन्च गरेर बारमाथिबाट फालिदिए । ४४औँ मिनेटमा मच्छिन्द्रका आयुश गलानले ३० यार्डदेखि गरेको प्रहार बारमा लागेर बाहिरिदा अग्रता तेब्बर बनाउने मौका गुमाए ।

४७औँ मिनेटमा स्टेफनले डिबक्स भित्रबाट गरेको कडा प्रहार कोलकाताका कप्तान सुमनले गोल हुनबाट उत्कृष्ट बचाए । गोलकिपर सुरज मल्कि अगाडि बढ्दा सुमनले गोल हुनबाट जोगाए ।

पहिलो हाफमा उत्कृष्ट प्रदर्शन गर्न नसके पनि दोस्रो हाफमा कोलकताले केही राम्रो अवसर खेर फालेका थियो । ६५औँ मिनेटमा स्टिफिनले प्रहार पोस्ट नजिकबाट बाहिरिएको थियो । यस्तै, ७०औँ मिनेट मनिष डाँगीले पासमा स्टिफिनको प्रहार कोलकत्ताका गोलकिपर सुरज मल्किले उत्कृष्ट बचाउ गरे ।

कोलकाताका खेलाडीको फिनिसिङ पक्ष कमजोर रहँदा बारम्बार पाएको गोल गर्ने अवसर चुकाउँदा पहिलो खेलबाटै घर फर्किन बाध्य भयो ।

हारपछि कोलकाताका प्रशिक्षक सौमेन्दु कुन्दुले खेलाडीहरूको थुप्रै अवसर पाउँदा पाउँदै पनि फिनिसिङ पक्ष कमजोर हुँदा पराजय भएको बताए । 

यता मच्छिन्द्रका प्रशिक्षक सन्तोष न्यौपानले खेलाडीहरूले योजना अनुसार आक्रमक खेल्दा नतिजा आफ्नो पक्षमा आएको बताए । सेमिफाइनलमा मंगलबार भएको क्वाटरफाइनलमा भएको गल्ती सच्याएर अगाडि बढ्ने बताए । सेमिफाइनलमा विमल घर्तीमगरलाई मैदानमा उतार्ने योजना रहेको उनले सुनाए ।