काठमाडौं । सत्तासाझेदार दल नेकपा (एकीकृत समाजवादी) सांसद राजेन्द्र पाण्डेले शिक्षामन्त्री सुमना श्रेष्ठले प्रशिक्षार्थी कर्मचारी भर्ना गर्ने नीति लिएको भन्दै विरोध जनाएका छन् । मंगलबार प्रतिनिधिसभा बैठकको विशेष समयमा उनले शिक्षामन्त्री श्रेष्ठले तयार पारेको शिक्षा उत्प्रेरक कार्यविधिले राज्यको संयन्त्रलाई अविश्वास गरिएको जिकिर गरे ।

७४ हजार निजामती कर्मचारीलाई अविश्वास गरेर ल्याइने कार्यविधिले प्रशिक्षार्थी भर्ना गर्दा कर्मचारी प्रशासनमा कस्तो प्रभाव पर्ला सरकारले सोचेको छ ? भन्दै उनले प्रश्न गरे । उनले यो विषयमा प्रधानमन्त्री जानकार हो कि होइन भन्दै आफूखुसी जे मन लाग्यो त्यही गर्ने छुट शिक्षामन्त्रीलाई छ ? भनी प्रश्न गरे ।

“जे मन लाग्यो त्यही निर्णय गर्न पाइन्छ ? ७४ हजार निजामती प्रशासनलाई प्यारालाइज गर्न ल्याएको नीति हो यो,” उनले भने ।

उनले यो कार्यविधि कुन ऐनानुसार बनेको भन्दै ‘नयाँ कुरा यही हो ? नयाँ कुरा देखाउँछौँ भनेको यही हो ?’ भनी थप प्रश्न गरे ।

सबै मन्त्रीले आफू मातहतलाई विश्वास नगरे परिस्थिति कस्तो बन्छ भन्ने उनको प्रश्न थियो । उनले गृहमन्त्रीले प्रहरीले काम नगरेको भनेर प्रशिक्षार्थी भर्ना गर्ने र रक्षामन्त्रीले पनि नेपाली सेनालाई विश्वास नगरेर छुट्टै प्रशिक्षार्थी सैनिक ल्याउँछु भने हालत के हुन्छ भन्दै प्रश्न गरे ।

“आज गृहमन्त्रीले मेरो अन्डरका पुलिसले काम गरेनन् म छुट्टै पुलिस भर्ना गर्छु, रक्षामन्त्रीले छुट्टै सेना भर्ना गर्छु भन्न पाउने कि नपाउने ?,” उनले प्रश्न गरे ।

शिक्षामन्त्रीले यो विषयमा सदनमा आएर जवाफ दिन आवश्यक रहेको उनले बताए ।