काठमाडौं । सरकारका विभिन्न निकायका वेबसाइट 'डाउन' भइरहेको विषयमा संसद्‌मा कुरा उठेको छ । नेपाली कांग्रेसका सांसद प्रदीप पौडेलले मंगलबारको प्रतिनिधिसभा बैठकको शून्य समयमा यसबारे कुरा राखेका हुन् ।

उनले भने, “गत बिहीबार र शुक्रबार प्रतिनिधिसभाको वेबसाइट नै डाउन भयो । बिहीबार अध्यागमन कार्यालयको सर्भर डाउन हुँदा यात्रुहरूले करिब चार घण्टा कुर्नुपर्‍यो, कयौँ उडान प्रभावित भए ।”

उनले यी विषयले डिजिटल सिस्टमप्रति सरकारको प्रतिबद्धता छैन भन्ने देखाएको उनले टिप्पणी गरे । “सोही दिन (बिहीबार) भन्सार विभागको वेबसाइट डाउन हुँदा पाँच घण्टा काम रोकियो,” सांसद पौडेलले प्रश्न गरे, “राज्यको मुख्य सम्पत्ति भनेको डाटा हो । राज्यले आफ्नो डाटाको सुरक्षा त गर्न सक्दैन नागरिकको डाटाको सुरक्षा कसरी गर्न सक्छ ?”