काठमाडौं । प्रधानन्यायाधीश विश्वम्भरप्रसाद श्रेष्ठले विगतको तुलनामा अहिले अदालतका काम कारबाही व्यवस्थित हुँदै गएको दाबी गरेका छन् । सोमबार चितवनमा सञ्चारकर्मीहरूसँग कुरा गर्दै उनले मुद्दालाई निश्चित समयमा सक्नुपर्ने ध्येयबाट नै अदालत अघि बढिरहेको बताए ।

उनले अदालतमा अहिले धेरै पुराना मुद्दाहरू नरहेको जिकिर गर्दै सबैभन्दा पुरानो मुद्दा भनेकै २०६७ सालसम्मको रहेको बताए । उनले १० वर्ष नाघेका मुद्दा जम्मा ४० थान मात्रै रहेको पनि जानकारी दिए ।

मुद्दाहरूलाई कानुनी बाटो अपनाएर छिटो छरितो गर्ने काममा प्रतिबद्ध रहेको उनको भनाइ छ ।

"हामीसँग धेरै पुराना मुद्दाहरू छैनन् । धेरै पुराना भनेको ०६७ सालका मुद्दाहरू छन् । ती मुद्दाहरूलाई हामीले पक्षबाट न्यूनीकरण गर्नका निम्ति काम गरिरहेका छौँ । अहिले हामीसँग १० वर्ष नाघेका मुद्दा जम्मा ४० थान मात्रै छन्," उनले भने ।

प्रधानन्यायाधीश श्रेष्ठले जिल्ला अदालतहरूमा आवश्यक पर्ने न्यायाधीशहरूको व्यवस्थापन विस्तारै हुँदै जाने पनि बताए ।