काठमाडौं । लेखनका विविध विधामा कलम चलाउँदै आएका कवि विप्लव प्रतीक अब हाइकुसंग्रह लिएर उपस्थित भएका छन् । विप्लवको नयाँ पुस्तक ‘शाडेनफ्रोएडा’ शनिबार साहित्यिक जमघटका बीच विमोचन गरिएको छ ।

संगीतकार न्ह्यु बज्राचार्य, अभिनेता सुनील थापा र सांगीतिक अभियन्ता रिन्छेन योञ्जनलाई पुस्तक हस्तान्तरण गरेर लेखकले आमपाठकमाझ यसलाई पस्केको घोषणा गरेका थिए । कार्यक्रमको सुरुआतै विप्लवले उपस्थितको स्वागतमा रचित हाइकु सुनाएर गरेका थिए ।

पुस्तकमा दर्दको काव्यिक अभिव्यक्तिबाट मिल्ने सन्तुष्टि अर्थात् जर्मनीको ‘शाडेनफ्रोएडा’लाई आवरणमा राख्दै फराकिलो दायरामा विस्तार गर्न खोजिएको छ । कवितासंग्रह, गीत, उपन्यास, नाटक, निबन्ध, पत्रकारिता, सिनेमा, वृत्तचित्र, अनुवाद र विज्ञापनका क्षेत्रमा आफ्ना पदचाप छाड्दै आएका विप्लवले सूक्ष्म काव्यिक अभिव्यक्ति मानिने हाइकुसंग्रह पहिलोपटक पाठकमाझ प्रस्तुत गरेका हुन् ।

“सन् २००६ तिर म यो विधासँग नजिकिएको हुँ,” उनले भने, “कविता सुनाउन भक्तपुर गएका बखत ख्यालख्यालमै लेखेको एउटा हाइकुले मलाई यहाँसम्मको यात्रा गराएको हो ।”

पुस्तकका अक्षरहरू कम्प्युटरका लिपि नभई स्वयं विप्लवकै हस्ताक्षरबाट मुद्रित छन् । पुस्तकभित्र अनुराग, सम्झना, खेद, दर्द, अश्रु, मनदह, सपना, जीवनध्वनि गरी आठखण्डमा हाइकु समेटिएको छ, जसले भावको आरोह–अवरोहयुक्त यात्रा गराउँछ ।

‘शाडेनफ्रोएडा’लाई पब्लिकेसन संस्था नेपालयले अडियो बुकका रूपमा पनि प्रस्तुत गर्दै छ । अर्थात्, सुन्नेले कविकै स्वरमा त्यसको आनन्द लिन सक्नेछन् ।

पुस्तकको प्रतिमूल्य ४९५ रुपैयाँ राखिएको छ ।