काठमाडौं । प्रहरी प्रधान कार्यालयले बुधबार प्रहरी नायब उपरीक्षक (डीएसपी)बाट प्रहरी उपरीक्षक (एसपी)मा गरेको बढुवा सिफारिस विवादित बनेको छ । १२ नम्बरका डीएसपी विनोद घिमिरे बढुवा सिफारिस सूचीमा परेका छन् । तर, पहिलो नम्बरका प्रदीप क्षेत्री सो सूचीमा नपरेपछि विवादित बनेको हो ।

घिमिरे प्रधानमन्त्री पुष्पकमल दाहाल ‘प्रचण्ड’का पूर्वपीएसओ समेत हुन् । आठौँ र नवौँ नम्बरमा रहेका डीएसपी राजन लिम्बू र सन्तोष तामाङ समेत बढुवा सिफारिसमा परेका छन् । उनीहरू दुवैजना पूर्वप्रधानमन्त्री केपी शर्मा ओलीका पीएसओ हुन् ।

• आठ डीएसपीको एसपीमा बढुवा (सूचीसहित)

कुल आठ रिक्त दरबन्दीका निम्ति १२ डीएसपीमध्येबाट उनीहरूलाई बढुवा सिफारिस गरिएको छ । यसअघिका दुईपटकको बढुवामा १२ जना नै छुटेका थिए । अघिल्लोपटक भने प्रहरी प्रधान कार्यालयले सिरियल नम्बरअनुसार बढुवा गरेको थियो ।

योपटक कार्यसम्पादन मूल्यांकनका आधारमा बढुवा गरिएको प्रहरी प्रधान कार्यालयले जनाएको छ । ०७२ सालमा उनीहरू सबै एकसाथ इन्स्पेक्टरबाट डीएसपी भएका थिए ।