काठमाडौं । नेकपा एमालेका सांसद कृष्णगोपाल श्रेष्ठले दुर्गा प्रसाईंलाई स्वचालित हतियारको सुरक्षा किन चाहियो भन्दै प्रश्न उठाएका छन् । उनले रूसको मस्कोमा भएको आतंकवादी हमलाको स्मरण गराउँदै यसलाई सामान्य रूपमा नलिन गृहमन्त्री रवि लामिछानेलाई आग्रह गरे । 

“यो देशमा दुर्गा प्रसाईं जस्तो एउटा नागरिकलाई स्वचालित हतियारको सुरक्षा किन चाहियो । राष्ट्रपतिको सुरक्षामा कस्ता हतियार छन् । स्वयम् गृहमन्त्रीको सुरक्षामा त्यस्ता हतियारको प्रयोग भएको छ कि छैन ?,” श्रेष्ठले प्रश्न गर्दै भने, “दुर्गा प्रसाईंको सुरक्षा गार्डलाई धन्यवाद जसले स्वचालित हतियार सर्वोच्च अदालतको गेटमा पुगेर देखाइदियो र सबैले थाहा पाउने अवस्था बन्यो ।” 

उनले यस्तो लाइसेन्स किन दिइयो, लाइसेन्समा उल्लेखित हतियार नै हो वा फरक परेको छ, नागरिकको व्यक्तिगत सुरक्षाका लागि यस्तो हतियार आवश्यक छ कि छैन ? भन्दै प्रश्न गरेका थिए । “गृहमन्त्रीजी रूसको मस्कोमा भएको हमला सम्झेर यस विषयमा ध्यान दिनु होला,” श्रेष्ठले भने, “यो हतियार सर्वोच्चमा देखिनुको साटो कुनै अप्रिय घटना भएको भए के हुन्थ्यो ?”